ఢిల్లీలో హిజ్బుల్ మిలిటెంట్ల అరెస్టు

న్యూఢిల్లీ: హిజ్బుల్ ముజాహిదీన్ మిలిటెంట్లుగా అనుమానిస్తూ ఢిల్లీ పోలీసులు గురువారం రాత్రి ఇద్దరిని అరెస్టు చేశారు. స్వాతంత్ర్య దినోత్సవం సందర్భంగా వారు దాడులకు ప్రయత్నాలు సాగిస్తున్నట్లు పోలీసులు అనుమానిస్తున్నారు. తెల్ల సాంత్రో కారులో వెళ్తుండగా ఢిల్లీలోని దార్యాగంజ్ ప్రాంతంలో వారిని పోలీసులు అదుపులోకి తీసుకున్నారు. వారిని మహావీర్ పార్కింగ్ ప్రాంతంలో అరెస్టు చేశామనని జాయింట్ పోలీసు కమిషనర్ (ప్రత్యేక విభాగం) పిఎన్ అగర్వాల్ చెప్పారు.

వారి కదలికలపై తమకు నిఘా సంస్థల సమాచారం ఉందని, ఆ సమాచారం మేరకు వారిని పట్టుకున్నామని ఆయన చెప్పారు. స్వాతంత్ర్య దినోత్సవం సందర్భంగా ఢిల్లీ, కోల్ కత్తా, హైదరాబాదు నగరాల్లో ఉగ్రవాదులు దాడులకు కుట్ర పన్నుతున్నట్లు నిఘా సంస్థలు సమాచారం అందించిన కొన్ని గంటల వ్యవధిలోనే ఆ ఆరెస్టు జరిగాయి. అరెస్టయిన మిలిటెంట్ల నుంచి రెండు ఎకె 47 రైఫిళ్లు, వంద కాట్రిడ్జ్ లు, రెండు గ్రెనేడ్లు స్వాధీనం చేసుకున్నారు.