అక్రమమని ఎలా చెప్తాం: మొయిలీ

హైదరాబాద్: కృష్ణా నదిపై కర్ణాటక నిర్మిస్తున్న ప్రాజెక్టులు అక్రకమమని ఎలా చెప్పగలమని కేంద్ర న్యాయశాఖ మంత్రి, కాంగ్రెసు ఆంధ్రప్రదేశ్ వ్యవహారాల మంత్రి వీరప్పమొయిలీ ప్రశ్నించారు. రాష్ట్రాల మధ్య వివాదాలను చర్చల ద్వారా పరిష్కరించుకోవాలని, కేంద్రం జోక్యం చేసుకోదని ఆయన అన్నారు. వీరప్ప మొయిలీ గతంలో కర్ణాటక ముఖ్యమంత్రిగా పని చేసిన విషయం తెలిసిందే. బచావత్ ట్రిబ్యునల్ గతంలోనే కృష్ణా నదికి సంబంధించి నీటి వాటాను నిర్ణయించిందని ఆయన ఆదివారం మీడియా ప్రతినిధులతో అన్నారు. ప్రస్తుతం బచావత్ ట్రిబ్యునల్ వద్ద వాదనలు పూర్తయ్యాయని, కృష్ణా జలాలకు సంబంధించి తీర్పు వెలువడతుందని, ఇది అన్ని ప్రాంతాల ప్రయోజనాలు కాపాడేలా ఉంటుందని ఆయన అన్నారు.

కృష్ణా - గోదావరి బేసిన్ గ్యాస్ పై జాతీయ విధానం అమలవుతుందని, అయితే ఆంధ్రప్రదేశ్ రాష్ట్రం ఇబ్బంది పడాలన్నది తమ అభిమతం కాదని ఆయన అన్నారు. జాతీయ విధానం పరిధిలో ఆంధ్రప్రదేశ్ ప్రయోజనాలను కాపాడుతామని ఆయన చెప్పారు. రాజకీయాల్లో వెనకబడిన తరగతులకు క్రీమీలేయర్ విధానాన్ని వర్తింపజేయడం సాధ్యం కాదని ఆయన అభిప్రాయపడ్డారు. కరవు వల్లనే ధరలు పెరుగుతున్నాయని ఆయన చెప్పారు. ర్యాగింగ్ ను అరికట్టడానికి అవసరమైతే జాతీయ స్థాయిలో చట్టాన్ని తెస్తామని ఆయన చెప్పారు.