మనసు విప్పుతా: విజయశాంతి

హైదరాబాద్: దేవుడు కరుణించినప్పుడే తెలంగాణ రాష్ట్రం ఏర్పడుతుందని తెలంగాణ రాష్ట్ర సమితి (తెరాస) పార్లమెంటు సభ్యురాలు విజయశాంతి అన్నారు. ఈలోగా అభివృద్ధి కూడా ముఖ్యమేనని ఆమె అన్నారు. కాంగ్రెసు శాసనసభ్యుడు తూర్పు జయప్రకాష్ రెడ్డితో కలిసి మెదక్ పార్లమెంటు నియోజకవర్గంలో పర్యటనకు బయలు దేరే ముందు ఆమె సోమవారం మీడియాతో మాట్లాడారు. సమయం వచ్చినప్పుడు తెరాస అధ్యక్షుడు కె. చంద్రశేఖరరావు వైఖరిపై మాట్లాడతానని ఆమె అన్నారు. త్వరలో మనసు విప్పుతానని ఆమె చెప్పారు.

తన నియోజకవర్గం ప్రజలను కలుసుకునేందుకు కెసిఆర్ అనుమతి అవసరం లేదని ఆమె అన్నారు. ప్రజల సమస్యలను ప్రభుత్వం దృష్టికి తీసుకువెళ్తానని ఆమె చెప్పారు. రాష్ట్ర ప్రజలు కరవుతో అల్లాడుతున్నారని ఆమె ఆవేదన వ్యక్తం చేశారు. రాజకీయాలకు అతీతంగా రాజకీయ నాయకులందరూ ప్రజలకు మనో ధైర్యాన్ని అందించాలని ఆమె కోరారు. తల్లి తెలంగాణ పార్టీని పునరుద్ధరించే విషయంపై ఇప్పుడే ఏమీ చెప్పలేనని ఆమె అన్నారు.