ఈ శతాబ్ది అతి పెద్ద కరువు: ప్రణబ్

న్యూఢిల్లీ: ప్రస్తుతం దేశం ఈ శతాబ్దిలోనే అతి పెద్ద కరువును ఎదుర్కుంటోందని కేంద్ర ఆర్థిక మంత్రి ప్రణబ్ ముఖర్జీ మంగళవారం హెచ్చరించారు. వర్షాలు ఆలస్యం కావడం వల్ల, వర్షాభావ పరిస్థితుల వల్ల అతి పెద్ద కరువును దేశం ఎదుర్కుంటోందని ఆయన అన్నారు. దేశంలోని పలు ప్రాంతాల్లో వ్యవసాయం ఘోరంగా దెబ్బ తింటుందని ఆయన అన్నారు. అయితే ప్రజలు ఆందోళన చెందాల్సిన అవసరం లేదని, ప్రభుత్వం తగిన చర్యలు తీసుకుంటోందని ఆనయ చెప్పారు.

కరువు పరిస్థితుల ప్రభావం ఆర్థిక పెరుగుదలపై కూడా పడే ప్రమాదం ఉందని ఆయన అన్నారు. దేశంలోని 161 జిల్లాలను కరువు ప్రాంతాలుగా ప్రకటించిన నేపథ్యంలో ఆర్థిక మంత్రి ఈ ప్రకటన చేశారు. కాగా, ప్రధాని డాక్టర్ మన్మోహన్ సింగ్ కరువు పరిస్థితులపై సమీక్షలు జరుపుతున్నారు. మన్మోహన్ సింగ్ 13వ ఆర్థిక సంఘం చైర్మన్ విజయ్ కేల్కర్, ప్రణాళికా సంఘం కార్యదర్శి సుధా పిళ్లైలతో సమావేశమై కరువు పరిస్థితులపై సమీక్ష జరిపారు.