నేను రైతునే, నాకు తెలుసు: వైయస్

హైదరాబాద్: తాను రైతునే అని, రైతు సమస్యలు తనకు తెలుసునని ముఖ్యమంత్రి డాక్టర్ వైయస్ రాజశేఖర రెడ్డి అన్నారు. శాసనసభ వాయిదా పడిన తర్వాత ఆయన గురువారం మీడియా ప్రతినిధులతో మాట్లాడారు. కరువు చర్యలపై తెలుగుదేశం ప్రభుత్వంపై చేస్తున్న విమర్శల్లో నిజం లేదని ఆయన అన్నారు. కరువు సహాయక చర్యలు, ధరల అదుపులపైనే తాము దృష్టి కేంద్రీకరిస్తామని ఆయన చెప్పారు. ధరల అదుపునకు రాష్ట్ర, జిల్లా స్థాయి నియంత్రణ కమిటీలను ఏర్పాటు చేస్తామని, ఇందులో జాయింట్ కలెక్టర్, రైతులు, వినియోగదారులు, వ్యాపారులు ఉంటారని ఆయన చెప్పారు.

కంది సాగు విస్తీర్ణం పెంచడానికి ప్రాధాన్యం ఇవ్వనున్నట్లు ఆయన తెలిపారు. బత్తాయి పంటలకు నీటి సహకారం అందించేందుకు కృషి చేస్తామని ఆయన చెప్పారు. సరుకుల అక్రమ నిల్వదారులపై కఠిన చర్యలు తీసుకుంటామని ఆయన చెప్పారు. నెలాఖరులోగా పశుగ్రాస శిబిరాలు ఏర్పాటు చేస్తామని ఆయన చెప్పారు. ఇంతటి కరవు గత 60 ఏళ్లలో చూడలేదని ఆయన అన్నారు.