మీనమేషాలు లెక్కించొద్దు: చిరు

హైదరాబాద్: కరువు సహాయక చర్యలు చేపట్టడంలో మీనమేషాలు లెక్కించవద్దని ప్రజారాజ్యం పార్టీ శాసనసభా పక్ష నాయకుడు చిరంజీవి ప్రభుత్వానికి సూచించారు. కరువుపై జరిగిన చర్చలో ఆయన శుక్రవారం పాల్గొన్నారు. కేంద్రం నుంచి నిధులు రాబట్టడంలో రాష్ట్ర ప్రభుత్వ జాప్యం అనేక అనుమానాలకు తావిస్తోందని ఆయన అన్నారు. ఎంతమంది చనిపోతే ప్రభుత్వం కదులుతుందని, ఒకటి రెండు ప్రాణాలు ప్రాణాలు కావా అని ఆయన అడిగారు. కరవు ప్రాంతాల్లో పర్యటనలు చేసి ప్రజలకు, రైతులకు భరోసా ఇస్తే బాగుండేదని ఆయన అన్నారు. పర్యటనలు జరపడానికి ఎందుకు సంశయిస్తున్నారని ఆయన ప్రభుత్వ పెద్దలను ప్రశ్నించారు.

రైతులను అదుకోవడంలో ప్రభుత్వం జాప్యం చేస్తోందని ఆయన విమర్శించారు. కరవుపై తాను కొత్తగా మాట్లాడేదేమీ లేదని, ఇంతకు ముందు సభ్యులు కూడా చెప్పారని, ప్రభుత్వానికి కూడా తెలుసునని, అయితే ప్రభుత్వం చర్యలు తీసుకోవాల్సిన అవసరం ఉందని ఆయన అన్నారు. రాష్ట్రాన్ని కరవు ప్రాంతంగా ప్రకటించాలని, కేంద్రం నుంచి కనీసం పదివేల కోట్ల ప్యాకేజీని రాబట్టాలని, రైతుల రుణాలను మాఫీ చేసి కొత్త రుణాలు ఇవ్వాలని, మరణించిన రైతుల కుటుంబాలను ఆదుకోవాలని ఆయన ప్రభుత్వాన్ని కోరారు.

రాజకీయ పార్టీలకు అతీతంగా కరువుపై చర్యలు చేపట్టాల్సిన అవసరం ఉందని, ఈ విషయంలో పార్టీలకు అతీతంగా వ్యవహరించాల్సి ఉందని తెలంగాణ రాష్ట్ర సమితి (తెరాస) శాసనసభా పక్ష నాయకుడు ఈటెల రాజేందర్ అన్నారు. తెలిసిన విషయాలను అంగీకరించి చర్యలు తీసుకుని పరిష్కారం చేయడం అవసరమని ఆయన అన్నారు.