వైయస్ తో శోభా నాగిరెడ్డి భేటీ

హైదరాబాద్: ముఖ్యమంత్రి డాక్టర్ వైయస్ రాజశేఖర రెడ్డితో ప్రజారాజ్యం పార్టీ శాసనసభ్యురాలు శోభా నాగిరెడ్డి శుక్రవారం ఉదయం భేటీ అయ్యారు. శాసనసభ ఆవరణలోని ముఖ్యమంత్రి ఛేంబర్ లో ఆమె వైయస్ రాజశేఖర రెడ్డిని కలిశారు. ముఖ్యమంత్రితో సమావేశం తర్వాత ఆమె ప్రజారాజ్యం పార్టీ శాసనసభ్యుడు కాటసాని రామిరెడ్డితో చర్చలు జరిపారు. ఆళ్లగడ్డకు చెందిన ఇద్దరు ఖైదీలకు క్షమాభిక్ష విషయంలో మాట్లాడేందుకు శోభా నాగిరెడ్డి ముఖ్యమంత్రిని కలిసినట్లు చెబుతున్నారు.

కాటసాని రామిరెడ్డి త్వరలో తన విధేయతను కాంగ్రెసు వైపు మళ్లించే సూచనలున్నట్లు కొద్ది రోజులుగా వార్తలు వస్తున్నాయి. ఈ నేపథ్యంలోనే ప్రజారాజ్యం పార్టీ కాంగ్రెసులో విలీనం కానున్నట్లు వార్తలు వచ్చాయి. ఈ పరిస్థితిలో శోభా నాగిరెడ్డి ముఖ్యమంత్రితో సమావేశం కావడం, ఆ తర్వాత కాటసాని రామిరెడ్డితో చర్చలు జరపడం ప్రాధాన్యాన్ని సంతరించుకుంది.