అసెంబ్లీ: ఇందిరమ్మ ఇళ్లపై రభస

హైదరాబాద్: ఇందిరమ్మ గృహాలపై సోమవారం శాసనసభలో తీవ్ర రభస జరిగింది. దీంతో స్పీకర్ కిరణ్ కుమార్ రెడ్డి సభను 15 నిమిషాల పాటు వాయిదా వేశారు. ఇందిరా ఆవాస్ యోజన కింద 3 వేల కోట్ల రూపాయలు దుర్వినియోగం అయ్యాయని ప్రతిపక్ష నాయకుడు నారా చంద్రబాబు నాయుడు ఆరోపిస్తూ దానిపై సభా సంఘం వేయాలని డిమాండ్ చేశారు. ఈ పథకం కింది నిధులను వేరే పథకాలకు మళ్లించలేదని ముఖ్యమంత్రి డాక్టర్ వైయస్ రాజశేఖర రెడ్డి స్పష్టం చేస్తూ రాజకీయ విమర్శలకు దిగారు. తెలుగుదేశం పార్టీతో పొత్తు పెట్టుకోవడం వల్ల వామపక్షాలు, తెలంగాణ రాష్ట్ర సమితి సీట్లు తగ్గాయని ఆయన అంటూ ఎన్నెన్ని సీట్లు తగ్గాయో వివరించడం మొదలు పెట్టారు. దీనికి తెలుగుదేశం సభ్యులు తీవ్ర అభ్యంతరం చెప్పారు. ఈ సమయంలో తీవ్ర గందరగోళం నెలకొంది. దీంతో సభను స్పీకర్ వాయిదా వేశారు.

ఇందిరా ఆవాస్ యోజన కింద నిధులను ఇతర పథకాలకు మళ్లిస్తే ఆ తర్వాత ఒక్క పైసా రాదని చంద్రబాబు అన్నారు. ఇందిరా ఆవాస్ యోజన కింద నిధులు దుర్వినియోగం అయ్యాయని, ఈ దుర్వినియోగంలో 31 మంది ప్రజాప్రతినిధులున్నారని, సభా సంఘం వేస్తే వాటిని నిరూపిస్తే రుజువు చేస్తామని ఆయన చెప్పారు. ఎస్సీ, ఎస్టీలకు ఇందిరా ఆవాస్ యోజన కింద కట్టిన ఇళ్లలో ఏమీ దక్కలేదని, వారికి 60 శాతం ఇళ్లు కట్టించాల్సి ఉంటుందని ఆయన అన్నారు. చట్టాలు కాంగ్రెసు వారికి చుట్టాలుగా మారాయని, రాష్ట్ర సంపదను దోచుకు తింటున్నారని ఆయన ఆరోపించారు. నిస్పృహతో ముఖ్యమంత్రి ఉన్నట్లు ఆయన వ్యాఖ్యానించారు.