ఇక మీతో మాట్లాడను

హైదరాబాద్‌: ఈ నెల 1వ తేదీన శాసనసభ బడ్జెట్‌ సమావేశాల చివరి రోజున అసెంబ్లీ లాబీలలో యాధృచ్చికంగా మీడియా ప్రతినిధులకు ఎదురైన ముఖ్యమంత్రి డాక్టర్‌ వైఎస్‌ రాజశేఖర్‌రెడ్డి వారిని ఆత్మీయంగా పలకరించారు. ఏదైనా చెప్పండి సార్‌ అని విలేకరులు అనడంతో మీరు ఒకటి చెబితే మరొకటి రాస్తున్నారు, 'మీతో ఇక ఎప్పుడు మాట్లాడను" అని చిరునవ్వుతో అలా ముందుకు సాగారు. ఈ సంఘటన యథాలాపంగానే జరిగినప్పటికీ విధి వక్రీకరించింది. భగవంతుడు మాత్రం ఆయన మాటలను నిజం చేసినట్లనిపిస్తుంది. వైఎస్‌ వాక్కును ఇక విలేకరులు శాశ్వతంగా వినే అవకాశం లేకుండా పోయింది.

సరిగ్గా ఇలాంటి ఉదంతమే వైఎస్ ఎప్పుడూ స్మరించే ఇందిరా గాంధీ జీవితంలోనూ చోటుచేసుకుంది. దాదాపు పాతికేళ్ల క్రితం ఆనాటి ప్రధానమంత్రి ఇందిరా గాంధీ భువనేశ్వర్‌ పర్యటనలో 'నా చివరి రక్తపు బొట్టు కూడా భారత జాతికి సేవ చేయడంలో సంతృప్తి చెందుతానని, ప్రజాసేవకోసం ప్రాణత్యాగం చేయడానికైనా సిద్ధమేన"ని ప్రకటించారు. ఆమె ప్రకటన యాధృచ్ఛికమే అయినప్పటికీ ఆ మరుసటి రోజు (అక్టోబర్‌ 31న) ఢిల్లీలోని ఆమె నివాసంలోనే సెక్యూరిటీ గార్డులు జరిపిన కాల్పులలో దారుణ హత్యకు గురైన సంఘటన తెలిసిందే.