ఎమ్మెల్యేలకు హైకమాండ్ పిలుపు

న్యూఢిల్లీ: హైదరాబాదులో అందుబాటులో ఉండాలని కాంగ్రెసు పార్టీ అధిష్ఠాన వర్గం పార్టీ శాసనసభ్యులను ఆదేశించింది. గురువారం సాయంత్రం 3 గంటలకల్లా హైదరాబాద్ చేరుకోవాలని వారికి సూచించింది. జిల్లా ఇంచార్జీ మంత్రుల ద్వారా పార్టీ శాసనసభ్యులకు పార్టీ అధిష్ఠాన వర్గం ఈ ఆదేశాలు జారీ చేసింది. దీంతో పార్టీ శాసనసభ్యులు హైదరాబాదుకు చేరుకుంటున్నారు. ముఖ్యమంత్రి అభ్యర్థి ఖరారు చేయడానికి నిర్ణయించుకోవడం వల్లనే హైకమాండ్ ఆ ఆదేశాలు జారీ చేసినట్లు భావిస్తున్నారు. ముఖ్యమంత్రి ఎంపికకు లెజిస్లేచర్ పార్టీ సమావేశం నిర్వహించాల్సి ఉంటుంది.

కాగా, ఆంధ్రప్రదేశ్ ముఖ్యమంత్రి వ్యవహారంపై పార్టీ అధిష్ఠాన వర్గం శుక్రవారం జరిగే కోర్ కమిటీలో చర్చించే అవకాశం ఉన్నట్లు చెబుతున్నారు. ఢిల్లీలో మకాం వేసిన దివంగత నేత వైయస్ రాజశేఖర రెడ్డి ఆత్మీయ మిత్రుడు కెవిపి రామచందర్ రావు సోనియా గాంధీ రాజకీయ సలహాదారు అహ్మద్ పటేల్ తో సమావేశమవుతారని చెబుతున్నారు. సాధ్యమైనంత త్వరగా జగన్ ను ముఖ్యమంత్రి పీఠంపై కూర్చోబెట్టాలనే ఉద్దేశంతో ఢిల్లీలో కెవిపి లాబీయింగ్ చేస్తున్నారు.