టెక్కలిలో మందకొడిగా పోలింగ్

శ్రీకాకుళం: శ్రీకాకుళం జిల్లాలోని టెక్కలి శాసనసభా నియోజక వర్గానికి గురువారం ఉదయం పోలింగ్ ప్రారంభమైంది. కట్టుదిట్టమైన భద్రతా ఏర్పాట్ల మధ్య పోలింగ్ మందకొడిగా మొదలైంది. ఈ స్థానానికి ఆరుగురు అభ్యర్థులు పోటీ పడుతున్నారు. కాంగ్రెసు శాసనసభ్యుడు రేవతీపతి మృతితో ఈ స్థానానికి ఉప ఎన్నిక జరుగుతోంది. కాంగ్రెసు అభ్యర్థిగా రేవతీపతి భార్య, తెలుగుదేశం నుంచి అచ్చెంనాయుడు, ప్రజారాజ్యం అభ్యర్థిగా దువ్వాడ శ్రీనివాస్ పోటీ పడుతున్నారు. వీరి ముగ్గురి మధ్య తీవ్రమైన పోటీ నెలకొని ఉంది.

టెక్కలి నియోజకవర్గంలోని 283 పోలింగ్ కేంద్రాల్లో సుమారు 1.77 లక్షల మంది ఓటర్లు తమ ఓటు హక్కును వినియోగించుకుంటున్నారు. ఏ విధమైన అవాంఛనీయమైన సంఘటనలు చోటు చేసుకోకుండా 1200 మంది పోలీసులను నియోగించారు. 36 సమస్యాత్మక కేంద్రాల్లో వీడియో కెమెరాలు ఏర్పాటు చేశారు. సాయంత్రం పోలింగ్ ముగిసిన తర్వాత శ్రీకాకుళం డిగ్రీ కళాశాలలో వీటిని భద్రపరుస్తామని కలెక్టర్ చెప్పారు. ఈ నెల 14వ తేదీన ఫలితం వెలువడుతుంది. గురువారం సాయంత్రానికి 50 శాతం పోలింగ్ జరిగే అవకాశం ఉందని భావిస్తున్నారు.