కెవిపి ఆశ నిరాశే...

న్యూఢిల్లీ: వైయస్ జగన్ ను ముఖ్యమంత్రిని చేయాలనే డిమాండ్ కు పార్టీ అధిష్ఠాన వర్గం లొంగకూడదనే నిర్ణయానికి వచ్చినట్లు తెలుస్తోంది. కేంద్ర మంత్రులు ప్రణబ్ ముఖర్జీ, వీరప్ప మొయిలీలే కాకుండా ఆంధ్రప్రదేశ్ కు చెందిన రాజ్యసభ సభ్యుడు కె. కేశవరావు చేసిన ప్రకటనలు ఈ విషయాన్ని తెలియజేస్తున్నాయి. ఆంధ్రప్రదేశ్ ముఖ్యమంత్రి వ్యవహారాన్ని ఎప్పుడు తేలుస్తామో ఇప్పుడే చెప్పలేమని ప్రణబ్ ముఖర్జీ కెవిపి రామచందర్ రావుకు తేల్చి చెప్పేశారు. పశ్చిమ బెంగాల్ నుంచి తిరిగి వచ్చిన తర్వాత ప్రణబ్ ముఖర్జీని దివంగత నేత వైయస్ రాజశేఖర రెడ్డి ఆత్మీయ మిత్రుడు కెవిపి రామచందర్ రావు ఆదివారం రాత్రి కలిశారు. రాష్ట్రంలో సాధారణ పరిస్థితులు నెలకొన్న తర్వాత పార్టీ తగిన నిర్ణయం తీసుకుంటుందని, ముఖ్యమంత్రి ఎవరు అవుతారు, ఎంత సమయం పడుతుందనే విషయాలపై తాను వ్యాఖ్యానించబోనని ప్రణబ్ ముఖర్జీ చెప్పారు. జగన్ ముఖ్యమంత్రి కావాలని పాపులర్ సెంటిమెంట్ ఉందన్న విషయం, ఆకస్మికంగా ఎగిసిన భావోద్వేగం గురించి తమకు తెలుసునని ఆయన అన్నారు. నిర్ణయం తీసుకునే ముందు వాటన్నింటినీ దృష్టిలో పెట్టుకుంటామని ఆయన అన్నారు.

ప్రణబ్ ముఖర్జీని ఆంధ్రప్రదేశ్ కు చెందిన కె. కేశవరావు కూడా కలుసుకున్నారు. తాను రాష్ట్రం గురించి ప్రణబ్ ను కలవలేదని, పశ్చిమ బెంగాల్ పై మాట్లాడేందుకే కలిశానని కేశవరావు మీడియా ప్రతినిధులకు చెప్పారు. అధిష్ఠానం అందరితో మాట్లాడి సరైన సమయంలో సరైన నిర్ణయం తీసుకుంటుందని కేశవరావు అన్నారు. రాష్ట్రంలో ముఖ్యమంత్రి ఉన్నారు, ఆలస్యం అయినా ఇబ్బందిలేదని ఆయన అన్నారు. కెవిపి రామచందర్ రావు ఆదివారం కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీని కలుసుకున్నారు. రాష్ట్రంలో సాధారణ పరిస్థితులు నెలకొన్న తర్వాత పార్టీ తగిన నిర్ణయం తీసుకుంటుందని వీరప్ప మొయిలీ అన్నారు రాష్ట్రంలో నాలుగున్నరేళ్లు ప్రభుత్వాన్ని అందించాల్సి ఉందని, తగిన సమయంలో సరైన పరిష్కార మార్గం కనుక్కుంటామని ఆయన అన్నారు. సోనియాతో మాట్లాడిన తర్వతా ఏ విషయమూ చెబుతామని ప్రణబ్ తనతో చెప్పినట్లు కెవిపి రామచందర్ రావు మీడియా ప్రతినిధులతో అన్నారు.