వైయస్ జగన్ గ్రూప్ డైలమా

హైదరాబాద్: కాంగ్రెసు అధిష్ఠాన వర్గం తమ ఒత్తిళ్లకు ఏ మాత్రం తలొగ్గకపోవడం దివంగత నేత వైయస్ రాజశేఖర రెడ్డి తనయుడు వైయస్ జగన్మోహన్ రెడ్డి వర్గీయులు డైలమాలో పడ్డారు. వైయస్ ఆత్మీయ మిత్రుడు కెవిపి రామచందర్ రావు చేసిన లాబీయింగ్ ఏ మాత్రం పనికి రాలేదు. పార్టీ అధిష్ఠాన వర్గం నేతలందరితో ఆయన జరిపిన సమావేశాలతో ఫలితాలు ఇవ్వకపోవడంతో ఆయన హైదరాబాద్ తిరిగి వచ్చారు. ముఖ్యమంత్రి, మంత్రులున్న తర్వాత ఇప్పుడే కొత్త నేతను ఎన్నుకోవడమేమిటనే వాదన పార్టీ అధిష్ఠాన వర్గం నుంచి వస్తోంది. కాంగ్రెసుకు మెజారిటీ ఉన్నా ముఖ్యమంత్రి రోశయ్యకు మెజారిటీ లేదనే పద్ధతిలో మీడియా వార్తలు రాస్తోందని, ఇది సరైన పద్ధతి కాదని కాంగ్రెసు అధికార ప్రతినిధి అభిషేక్ సింఘ్వీ అన్నారు.

అంతా మీడియా తప్పేనన్నట్లుగా ఆయన మాట్లాడారు. మీడియా సొంత డెడ్ లైన్లు పెట్టవద్దని ఆయన అన్నారు. సిఎల్పీ సమావేశం ఏర్పాటు చేయడం తమ సొంత వ్యవహారమని, అత్యవసరంగా సమావేశం ఏర్పాటు చేయాల్సిన అవసరం లేదని ఆయన సోమవారం సాయంత్రం న్యూఢిల్లీలో అన్నారు. అధిష్ఠాన వర్గం ఏ మాత్రం తమకు సుముఖంగా లేదని తెలియడంతో రాష్ట్రంలోని మంత్రులు మల్లగుల్లాలు పడుతున్నారు. కొంత మంది మంత్రులు సోమవారం రాత్రి ముఖ్యమంత్రి కార్యాలయంలో సమావేశమై చర్చలు జరిపారు. మంగళవారం కెవిపి రామచందర్ రావు మాట్లాడిన తర్వాత ఏం చేయాలనే దానిపై నిర్ణయం తీసుకోవాలని వారు ఆలోచిస్తున్నారు. మొత్తం మీద, జగన్ వ్యవహారాన్ని ఇప్పుడిప్పుడే తేల్చే ఉద్దేశంతో పార్టీ అధిష్ఠాన వర్గం లేదని స్పష్టమై పోయింది. అంతేకాకుండా జగన్ కు ముఖ్యమంత్రి పదవి ఇవ్వడం ఇష్టం లేకనే జాప్యం చేస్తోందనే మాట వినిపిస్తోంది. నిజానికి, జగన్ కు ముఖ్యమంత్రి పదవి ఇవ్వబోమని కెవిపి రామచందర్ రావుకు పార్టీ అధిష్టానం నాయకులు ఇప్పటికే స్పష్టం చేసినట్లు ప్రచారం జరుగుతోంది.