మాయ విగ్రహాలపై స్టే కొనసాగింపు

న్యూఢిల్లీ: లక్నోలో దళిత నేతల విగ్రహాల స్థాపనను నిలిపేస్తూ తాము ఇచ్చిన స్టే కొనసాగుతుందని సుప్రీంకోర్టు శుక్రవారం తెలిపింది. అంబేడ్కర్, కాన్షీరాం విగ్రహాలతో పాటు తన విగ్రహాలను కూడా నెలకొల్పడానికి ఉత్తరప్రదేశ్ ముఖ్యమంత్రి మాయావతి భారీ ప్రాజెక్టును చేపట్టారు. ఆ విగ్రహాల స్థాపనపై ఇంతకు ముందు సుప్రీంకోర్టు స్టే ఇచ్చింది. చాలా తక్షణ సమస్యలున్నాయని కోర్టు విచారణ సందర్భంగా వ్యాఖ్యానించింది.

ప్రభుత్వ లేదా ప్రజా ధనాన్ని ఇంత పెద్ద యెత్తున విగ్రహాల స్థాపనకు ఖర్చు చేయవచ్చునా లేదా అనేది ప్రశ్న అని సుప్రీంకోర్టు బెంచీ వ్యాఖ్యానించింది. ఒక వేళ బడ్జెట్ లో 80 శాతం నిధులను అటువంటి విగ్రహాల మీద, స్మారకాల మీద ఖర్చు చేస్తే అది న్యాయమవుతుందా అని కూడా ప్రశ్నించింది. మంత్రివర్గం, చట్టసభ రాజ్యాంగ పరిధిలో నడుచుకోవాల్సి ఉంటుందని అభిప్రాయపడింది. తదుపరి విచారణను సుప్రీంకోర్టు వచ్చే నెల 5వ తేదీకి వాయిదా వేసింది.