ప్రేమ ఘోరం: ఇద్దరి హత్య

రాజమండ్రి: ఓ ప్రేమోన్మాది ఘాతుకంతో రాజమండ్రి గురువారం రాత్రి ఉలిక్కిపడింది. మట్టా రాజేష్ అనే యువకుడు తాను ప్రేమిస్తున్న అనూష అనే అమ్మాయిని గొంతు కోశాడు. అడ్డు వచ్చిన అనూష తల్లిదండ్రులు నార్ల శ్రీనివాస్, సత్యవతిలను హత్య చేశాడు. తీవ్రంగా గాయపడిన అనూష ఆస్పత్రిలో చికిత్స పొందుతోంది. శ్రీనివాస్, సత్యవతి దంపతులకు ముగ్గురు ఆడపిల్లలున్నారు. వారిలో పెద్దమ్మాయి అనూష ఇటీవలే ఇంటర్ పూర్తి చేసింది. చాలా కాలంగా రాజేష్ ప్రేమ పేరుతో అనూషను వేధిస్తున్నాడు. ఆమె తిరస్కరించినప్పటికీ వెంట పడడం ఆపలేదు. గతంలో ఓసారి శ్రీనివాస్ రాజేష్ పై పోలీసులకు ఫిర్యాదు చేశాడు. దీనిపై పోలీసులు రాజేష్ ను హెచ్చరించారు. అతని తల్లిదండ్రులకు చెప్పారు. అయినా రాజేష్ వినలేదు. తిరిగి అనూష పోలీసులకు ఫిర్యాదు చేశారు.

రాజేష్ ను పోలీసులు కస్టడీలోకి తీసుకున్నారు. ఆ తర్వాత బయటకు వచ్చిన రాజేష్ గురువారం రాత్రి తొమ్మిది గంటల ప్రాంతంలో అనూష ఇంటికి వచ్చి అనూషపై దాడి చేశాడు. గొంతు కోశాడు. అడ్డు వచ్చిన తల్లిదండ్రులను దారుణంగా హత్య చేశాడు. రాజేష్ ను స్థానికులు కాళ్లూ చేతులూ కట్టేసి చితక బాదారు. ఆ తర్వాత రాజేష్ ను పోలీసులు అరెస్టు చేసి కేసు నమోదు చేశారు. రాజేష్ ను నరికి చంపాలని అనూష అంటోంది.