అల్లు అరవింద్ కు నో పోస్ట్

హైదరాబాద్: ప్రజారాజ్యం పార్టీ కార్యవర్గంలో పార్టీ అధినేత చిరంజీవి బావ మరిది, ప్రముఖ తెలుగు సినీ నిర్మాత అల్లు అరవింద్ కు స్థానం లభించలేదు. పార్టీ కార్యవర్గాన్ని చిరంజీవి ఆదివారం ప్రకటించారు. ఇందులో అల్లు అరవింద్ కు స్థానం లభించకపోవడం గమనార్హం. గతంలో పార్టీ ప్రధాన కార్యదర్శిగా ఆయన పదవీ బాధ్యతలు నిర్వహించారు. అల్లు అరవింద్ పై నాయకులు తీవ్ర విమర్శలు చేయడం వల్లనే ఆయనను కార్యవర్గంలోకి తీసుకోలేదని తెలుస్తోంది. అల్లు అరవింద్ ఏకపక్ష వ్యవహారాల వల్లనే సోదరులు పవన్ కళ్యాణ్, నాగబాబు పార్టీకి దూరమైనట్లు చిరంజీవి భావిస్తున్నట్లు తెలుస్తోంది. దీంతో అల్లు అరవింద్ ను పార్టీ కార్యవర్గంలో చేర్చుకోలేదని తెలుస్తోంది.

సినిమాల నిర్మాణంలో అల్లు అరవింద్ ప్రస్తుతం బిజీగా ఉన్నారు. హిందీ సినిమా గజినీ అనూహ్య విజయం సాధించింది. కలెక్షన్లు కూడా ఊహించనంత భారీ స్థాయిలో ఉన్నాయి. అదే విధంగా చిరంజీవి కుమారుడు రామ్ చరణ్ తేజా హీరోగా తీసిన మగధీర సినిమా కూడా డబ్బులు దండిగానే సంపాదించి పెట్టింది. ఈ స్థితిలో ఆయన సినిమాలపై ఎక్కువ దృష్టి సారిస్తారని, పార్టీ వ్యవహారాలకు కొంత కాలం దూరంగా ఉంటారని అంటున్నారు.