నేదురమల్లితో కేశవరావు భేటీ

హైదరాబాద్: మాజీ ముఖ్యమంత్రి నేదరుమల్లి జనార్దన్ రెడ్డి కాంగ్రెసు సీనియర్ నేత కె. కేశవరావు మంగళవారం కలుసున్నారు. వీరి భేటీకి గల కారణాలు తెలియడం లేదు. అయితే ముఖ్యమంత్రి మార్పు విషయంలోనే వీరిద్దరి మధ్య చర్చలు జరిగినట్లు ప్రచారం జరుగుతోంది. ముఖ్యమంత్రి ఎంపిక వ్యవహారంలో పార్టీ నాయకులంతా ఏకాభిప్రాయంతో ఉన్నారని కేశవరావు మీడియా ప్రతినిధులతో అన్నారు. పార్టీ అనిశ్చిత పరిస్థితి ఏమీ లేదని ఆయన స్పష్టం చేశారు.

దివంగత నేత వైయస్ రాజశేఖర రెడ్డి తనయుడు వైయస్ జగన్ ను ముఖ్యమంత్రిని చేయాలని డిమాండ్ వస్తున్న నేపథ్యంలో ఇటీవల కాంగ్రెసు పార్టీ అధిష్ఠాన వర్గం నేదురమల్లి జనార్దన్ రెడ్డిని ఢిల్లీకి పిలిపించి మాట్లాడింది. ఆయనతో అధిష్ఠాన వర్గం ఏం మాట్లాడిందీ తెలియడం లేదు. అలాగే ఇటీవలే ఢిల్లీ నుంచి వచ్చిన కేశవరావు నివాసం పార్టీ నాయకుల సందర్శనతో సందడిగా ఉంటోంది. ముఖ్యమంత్రి మార్పు వ్యవహారం గురించి కేశవరావుతో వారు చర్చలు జరిపినట్లు ప్రచారం జరుగుతోంది.