అమెరికాలో గాంధీ వేళ్లు: ఒబామా

వాషింగ్టన్: అమెరికా పునాదులు భారత మాహాత్మా గాంధీలో ఉన్నాయని అమెరికా అధ్యక్షుడు బరాక్ ఒబామా అన్నారు. అక్టోబర్ 2వ తేదీన మహాత్మా గాంధీ జయంతిని ప్రపంచ అహింసా దినోత్సవాన్ని నిర్వహించుకుంటున్న సందర్భంలో శుక్రవారం ఆయన ఈ ప్రకటన చేశారు. మహాత్మాగాంధీ బోధనలను, ఆదర్శాలను 1959 భారత పర్యటన సందర్భంగా మార్టిన్ లూథర్ జూనియర్ స్వీకరించారని, అమెరికా సమాజాన్ని పౌర హక్కుల ఉద్యమం ద్వారా మార్చివేశారని ఆయన అన్నారు. మహాత్మా గాంధీని అమెరికన్లు విశేషంగా గౌరవిస్తారని ఆయన చెప్పారు.

మహాత్మా గాంధీ అహింసాయుత పద్ధతిలో నడిపిన భారత స్వాతంత్ర్యోద్యమ వేళ్లు నేటి అమెరికా సమాజంలో ఉన్నాయని ఆయన అన్నారు. మహాత్మా గాంధీ బోధనలకు, జీవితానికి ఆయన జయంతి సందర్భంగా అమెరికా ప్రజలు నివాళులర్పిస్తున్నారని ఆయన చెప్పారు. ప్రపంచవ్యాప్తంగా ప్రజల, రాజకీయ ఉద్యమాలను అహింసా సందేశాన్ని ప్రతిబింబించాల్సిన సందర్భం నేటి అవసరమని ఆయన అన్నారు. సహనశీలత ద్వారా, అహింసాయుత పద్ధతిలో ప్రతిఘటనోద్యమాన్ని నడిపి సామాజిక న్యాయ సాధన కోసం కృషి చేసిన మహాత్మా గాంధీ ఆత్మశాంతి కోసం జరుపుకునే కార్యక్రమంలో అమెరికన్లు భాగస్వాములవుతారని ఆయన చెప్పారు.