కృష్ణా, నల్లగొండలకు వరద ముప్పు

హైదరాబాద్: కృష్ణా, నల్లగొండ జిల్లాలకు వరద ముప్పు పొంచి ఉంది. కృష్ణా నది ప్రమాద స్థాయిని దాటి ప్రవహిస్తుండడంతో పరీవాహక ప్రాంతాలు ముంపునకు గురయ్యే ప్రమాదం ఉంది. ఎగువ నుంచి కృష్ణా నదిలోకి పెద్ద యెత్తున నీరు వచ్చి చేరుతుంది. దీంతో కృష్ణా నది ఉప్పొంగి ప్రవహిస్తోంది. నల్లగొండ జిల్లాలోని పెద్ద అడిశర్లపల్లి, దామరచర్ల మండలాలకు పెద్ద యెత్తున ప్రమాదం వాటిల్లే అవకాశం ఉంది.

కృష్ణా జిల్లాలోని జగ్గయ్యపేటతో పాటు డజనుకు పైగా మండలాలకు వరద ప్రమాదం పొంచి ఉంది. లోతట్టు ప్రాంతాల ప్రజలు ఎగువ ప్రాంతాలకు తరలి వెళ్లాలని అధికారులు హెచ్చరించారు. సహాయ, పునరావాసాల కోసం అధికారులు చర్యలు చేపట్టారు. విజయవాడ నీట మునిగే ప్రమాదం ఉంది. లక్ష మందిని పునరావాస కేంద్రాలకు తరలించినట్లు ముఖ్యమంత్రి కె. రోశయ్య చెప్పారు. పలు గ్రామాలకు ముప్పు పొంచి ఉంది.