మహబూబ్ నగర్ జిల్లాలో వరదలు, నదుల్లో చిక్కుకున్న 38 మంది

మహబూబ్ నగర్: మహబూబ్ నగర్ జిల్లాను వరద నీరు ముంచెత్తుతోంది. పలు గ్రామాలకు ముప్పు ఏర్పడింది. జిల్లాలోని బొల్లిగడ్డ గ్రామం వద్ద కృష్ణా నదిలో చిక్కుకున్నారు. వారిని కాపడడానికి అధికారులు ప్రయత్నిస్తున్నారు. కాగా, దుందుభి నదిలో 14 మంది చిక్కుకుపోయారు. గురువారం రాత్రి నుంచి వారు ప్రాణాలను అరచేతిలో పట్టుకుని కాలం గడిపారు. వారిని అధికారులు సురక్షితంగా బయటకు తీశారు. నారగడ్డ వద్ద కృష్ణానదిలో 15 మంది కూలీలు చిక్కుకున్నట్లు తెలుస్తోంది.

మహబూబ్ నగర్ జిల్లాలోని వెల్తూరు వద్ద 15 మంది విద్యార్థులు వరదలో చిక్కుకున్నారు. వారిని అధికారులు రక్షించగలిగారు. ముడుమూల్ గ్రామాన్ని అధికారులు ఖాళీ చేయిస్తున్నారు. కర్నూలు జిల్లా మంత్రాలయంలో రెండు బస్సులు వరదల్లో చిక్కుకున్నాయి. ప్రయాణికులను తాళ్లు వేసి స్థానికులు బయటకు లాగే ప్రయత్నం చేస్తున్నారు. మంత్రాలయంలో 12 అడుగుల మేరకు నీరు ప్రవహిస్తోంది. మొత్తం 1200 ఇళ్లలో 60 ఇళ్ల ఆనవాళ్లు మాత్రమే కనిపిస్తున్నాయి.