పాక్ ఆర్మీ హెడ్ క్వార్టర్ పై దాడి

ఇస్లామాబాద్: రావల్పిండిలోని పాకిస్తాన్ సైనిక కేంద్ర కార్యాలయంపై సాయుధులు శనివారం దాడి చేశారు. దీంతో తమ బలగాలు ఎదురు కాల్పులు ప్రారంభించాయని సీనియర్ సైనికాధికారి ఒకరు చెప్పారు. సైనిక ఉన్నతాధికారులు కార్యాలయం లోపల చిక్కుకున్నారు. పరిస్థితిపై తనకేమీ తెలియదని, తనకు మాట్లాడే అధికారం లేదని ఆ అధికారి అన్నారు.

గ్రెనేడ్లు విసిరి ఉగ్రవాదులు లోనికి ప్రవేశించేందుకు ప్రయత్నించారు. దీంతో ఇరు పక్షాల మధ్య ఎదురు కాల్పులు జరుగుతున్నాయి. ఈ ఎదురు కాల్పుల్లో ఒక ఉగ్రవాది మరణించినట్లు తెలుస్తోంది. ఉగ్రవాదులు రావల్పిండి సైనిక కేంద్ర కార్యాలయం వద్దకు వాహనంలో వచ్చారు. భారీ పేలుడు పదార్థాలున్న వాహనంతో లోనికి చొచ్చుకుపోవడానికి ప్రయత్నించారని పోలీసు అధికారి మొహమ్మద్ జమీల్ చెప్పారు. ఉగ్రవాదులు వాహనం నుంచి దిగి కాల్పులు ప్రారంభించారని, సైనికులు ఎదురు కాల్పులు మొదలు పెట్టారని, కాల్పులు ఇంకా జరుగుతున్నాయని ఆయన చెప్పారు. దీంతో అక్కడ ఉద్రిక్త పరిస్థితి నెలకొని ఉంది.