ఇక జై తెలంగాణ ఉధృతం: కెసిఆర్

హైదరాబాద్: జై తెలంగాణ ఉద్యమాన్ని ఇక ఉధృతం చేస్తామని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు చెప్పారు. ఆయన మంగళవారంనాడు తెరాస శాసనసభా పక్ష కార్యాలయంలో మీడియా ప్రతినిధుల సమావేశంలో మాట్లాడారు. హైదరాబాద్ ను సుప్రీంకోర్టు ఫ్రీజోన్ గా ప్రకటిస్తూ ఇచ్చిన తీర్పుపై ప్రజారాజ్యం పార్టీ నేత హరిరామ జోగయ్య చేసిన ప్రకటనను ఆయన తీవ్రంగా ఖండించారు. హైదరాబాద్ ను ఫ్రీజోన్ గా ప్రకటిస్తూ చేసిన సుప్రీంకోర్టు ఆదేశాలను పోలీసు శాఖకే కాకుండా మిగతా శాఖలన్నింటికీ వర్తింపజేయాలని హరిరామ జోగయ్య చేసిన ప్రకటన వలసాధిపత్య దురహంకారంతో కూడిందని ఆయన వ్యాఖ్యానించారు. సుప్రీంకోర్టు తీర్పుపై సంయమనం పాటించాలని తాను పార్టీ నాయకులకు, కార్యకర్తలకు సూచించానని, గుండె రగిలిపోతున్నా అత్యున్నత న్యాయస్థానం తీర్పును గౌరవించాలనే ఉద్దేశంతో తాను సంయమనం పాటించానని ఆయన చెప్పారు.

సుప్రీంకోర్టు తీర్పుపై న్యాయ, క్షేత్రస్థాయి ఉద్యమాలు చేస్తామని ఆయన చెప్పారు. ఉద్యమ కార్యక్రమంపై ఈ నెల 15వ తేదీన జరిగే పార్టీ పోలిట్ బ్యూరో, కార్యవర్గ సమావేశాల్లో తుది నిర్ణయం తీసుకంటామని ఆయన చెప్పారు. ముల్కీ నిబంధనలను ఉల్లంఘించి ఉద్యోగ నియామకాలు జరిగాయని ఆయన విమర్శించారు. పెద్ద మనుషుల ఒప్పందాన్ని తుంగలో తొక్కారని ఆయన విమర్శించారు. తనను బేతాళమాంత్రిడు అని అన్న కాంగ్రెసు నాయకులపై ఆయన విరుచుకుపడ్డారు. హరిరామ జోగయ్య ఎవరి మేలు కాంక్షించి ఆ ప్రకటన చేశారని ఆయన విమర్శించారు. తమకు తెలివి లేక, పౌరుషం లేక మిన్నకుండలేదని, మానవతా దృక్పథంతో వ్యవహరించామని ఆయన చెప్పారు.