30 ఏళ్లకు పైగా జీవించే పాములు.. మన దేశ సర్ప జాతుల చరిత్ర!
సృష్టిలోని వింతలు, విశేషాల్లో సర్పాల ప్రపంచం ఎంతో ప్రత్యేకమైనది. భారతదేశంలో పాములను దైవంగా పూజించే ఆచారం ఉన్నప్పటికీ, వాటి గురించి మనకు తెలియని రహస్యాలు ఎన్నో ఉన్నాయి. ప్రతి ఏటా జూలై 16వ తేదీన ప్రపంచ పాముల దినోత్సవాన్ని జరుపుకుంటాం. భూమిపై శతాబ్దాలుగా సాగుతున్న జీవ పరిణామ క్రమాన్ని, గ్రహశకలాల తాకిడి వంటి విపత్తులను తట్టుకుని ఇవి ఎలా మనుగడ సాగించాయో తెలుసుకోవడానికి శాస్త్రవేత్తలు నిరంతరం పరిశోధనలు చేస్తూనే ఉన్నారు.
దేశంలో దాదాపు 300కు పైగా సర్ప జాతులు ఉండగా, వాటిలో కొన్ని ఇప్పటికీ నిగూఢంగానే ఉన్నాయి. అనుకూలమైన వాతావరణం, సరైన రక్షణ లభిస్తే ఏకంగా 30 సంవత్సరాలకు పైగా జీవించగల ఐదు అరుదైన భారతీయ పాముల గురించి ఈరోజు తెలుసుకుందాం!
1. కింగ్ కోబ్రా (తాచుపాము)
అంతర్జాతీయంగా అత్యంత పొడవైన విషపూరితమైన పాముగా కింగ్ కోబ్రా (ఒఫియోఫాగస్ హన్నా)కు గుర్తింపు ఉంది. పశ్చిమ కనుమలు, ఈశాన్య రాష్ట్రాలలోని దట్టమైన అడవులలో ఇవి ఎక్కువగా నివసిస్తాయి. ఈ పాముల ప్రత్యేకత ఏమిటంటే, ఇవి ఎక్కువగా ఇతర చిన్న పాములను మాత్రమే ఆహారంగా తీసుకుంటాయి. అడవులలో సహజ సిద్ధంగా ఇవి 20 ఏళ్ల వరకు బతికితే, మానవ సంరక్షణలో (జూ వంటి ప్రదేశాలలో) సుమారు 30 ఏళ్ల వయసు వరకు జీవించగలవు.
2. పొడపొడల కొండచిలువ (ఇండియన్ రాక్ పైథాన్)
అపారమైన ఓపికతో వేటాడే ఈ భారీ కొండచిలువ (పైథాన్ మోలురస్) విషపూరితం కానిది. సాధారణంగా అడవులు, గడ్డి భూములు, చిత్తడి నేలల్లో జీవించే ఈ కొండచిలువ.. పొంచి ఉండి ఆహారాన్ని బంధించి మింగేస్తుంది. భారతదేశంలో అత్యధిక కాలం బతికే సర్పాలలో ఇది ఒకటి. జూ లాంటి అనుకూల ప్రదేశాలలో సరైన సంరక్షణ అందిస్తే ఇవి 30 నుంచి 40 ఏళ్ల వరకు జీవించగలవు.
3. బర్మీస్ కొండచిలువ
ఈశాన్య భారతదేశంలోని అడవులలో ఎక్కువగా కనిపించే మరో భారీ కొండచిలువ పైథాన్ బివిట్టాటస్. దీని శరీరం భారీగా ఉన్నప్పటికీ, ఇది చాలా సిగ్గుపడే స్వభావాన్ని కలిగి ఉండి ఒంటరిగా జీవించడానికే ఇష్టపడుతుంది. జూలో పెరిగే ఈ జాతి కొండచిలువలు సులభంగా 30 సంవత్సరాల కంటే ఎక్కువ కాలం బతుకుతాయి, కొన్నిసార్లు వీటి ఆయుష్షు 40 ఏళ్ల వరకు కూడా సాగుతుంది.
4. భారతీయ నాగుపాము (ఇండియన్ కోబ్రా)
తల వెనుక అలంకారమైన గుర్తుతో మన దేశంలో ఎక్కడ పడితే అక్కడ కనిపించే సాధారణ పాము ఇది. పొదల్లో, ఎలుకల కన్నాల్లో, పుట్టల్లో ఎక్కువగా దాక్కుని ఉండే ఈ నాగుపాములకు కూడా సుదీర్ఘ ఆయుష్షు ఉంటుంది. జూలో ఇవి 30 సంవత్సరాలకు పైగా బతికినట్లు ఆధారాలు ఉన్నాయి. అయితే అడవుల నరికివేత, రోడ్డు ప్రమాదాల కారణంగా అడవులలో వీటి మనుగడకు తీవ్ర ముప్పు వాటిల్లుతోంది.
5. కింగ్ రాట్ స్నేక్ (జెర్రిపోతు)
ఈశాన్య భారత అడవులలో వేగంగా కదిలే విషరహిత సర్పం ఈ కింగ్ రాట్ స్నేక్ (ప్ట్యాస్ కారినాటా). చెట్లు ఎక్కడంలో అత్యంత నైపుణ్యం కలిగిన ఈ పాము మనుషుల కంట పడటం చాలా అరుదు. అయినప్పటికీ, అనుకూల వాతావరణం, రక్షణ లభించే ప్రదేశాలలో ఇవి సుమారు 30 ఏళ్లకు పైగా జీవించగలవు.
పాములు ఇంత కాలం ఎలా జీవించగలవు?
సర్పాలు చాలా తక్కువ ఆహారం తీసుకుంటాయి. ఒక్కసారి తింటే చాలా రోజుల వరకు ఆహారం లేకపోయినా సులభంగా జీవించగల అద్భుతమైన జీవక్రియ వీటి సొంతం. సహజ సిద్ధమైన అడవులలో ఉండే... జబ్బులు, వేటాడే ఇతర జంతువులు, వాతావరణ మార్పుల వంటి ముప్పులు ఏవీ కూడా జూ లో ఉండవు కాబట్టి ఇవి అక్కడ చాలా ఎక్కువ కాలం జీవించగలుగుతాయి.
మన దేశ పర్యావరణ సమతుల్యతను కాపాడటంలో ఈ సర్పాలు కీలక పాత్ర పోషిస్తాయి కాబట్టి.. అటవీ ప్రాంతాలను రక్షించడం, మనుషులకు-పాములకు మధ్య ఘర్షణలను తగ్గించడం ద్వారా వీటిని కాపాడుకోవాల్సిన అవసరం ఎంతైనా ఉందని వన్యప్రాణి నిపుణులు చెబుతున్నారు.
Click it and Unblock the Notifications
Sign in with Google