జగన్ కు కర్నాటక లాబీ దెబ్బ

హైదరాబాద్: కడప పార్లమెంటు సభ్యుడు వైయస్ జగన్ ఆంధ్రప్రదేశ్ ముఖ్యమంత్రి కాకుండా కర్నాటక లాబీయే ఎక్కువగా పని చేస్తున్నట్లు ప్రచారం జరుగుతోంది. ఆంధ్రప్రదేశ్ లాబీ కన్నా కర్నాటక లాబీయే జగన్ కు వ్యతిరేకంగా పనిచేస్తున్నట్లు తెలుస్తోంది. బిజెపి నాయకుడు, కర్నాటక మంత్రి గాలి జనార్దన్ రెడ్డితో ఉన్న సంబంధాలే అందుకు కారణమని అంటున్నారు. గాలి జనార్దన్ రెడ్డితో జగన్ కు వ్యాపార సంబంధాలు కూడా ఉన్నాయని అంటారు. గాలి జనార్దన్ రెడ్డి దివంగత నేత వైయస్ రాజశేఖర రెడ్డికి ఉన్న సన్నిహిత సంబంధాలు రహస్యమేమీ కాదు. కర్నాటక శాసనసభ ఎన్నికల సమయంలో వైయస్ రాజశేఖర రెడ్డి పోషించిన పాత్రపై కర్నాటక కాంగ్రెసు నేతలు అప్పట్లోనే తీవ్ర వ్యాఖ్యలు చేశారు. అప్పట్లో పార్టీ అధ్యక్షురాలు సోనియా గాంధీకి ఫిర్యాదు చేసినట్లు వార్తలు వచ్చాయి. ఈ నేపథ్యంలో కర్నాటక కాంగ్రెసు నాయకులు జగన్ ను ఆంధ్రప్రదేశ్ ముఖ్యమంత్రి పీఠంపై కూర్చోబెట్టకూడదని పార్టీ అధిష్టానంపై ఒత్తిడి తెస్తున్నట్లు సమాచారం.

కాగా, జగన్ మాత్రం పార్టీ అధిష్టానం ఆహ్వానంపై ఆశతో ఉన్నట్లు తెలుస్తోంది. ఆయన ప్రస్తుతం బెంగుళూర్ లో ఉన్నారు. అధిష్టానం నుంచి ఎప్పుడైనా పిలుపు రావచ్చునని, అందుకు సిద్ధంగా ఉండాలని అనుకుంటున్నట్లు తెలుస్తోంది. ఈ నెల 18, 22, 25 తేదీల్లో జగన్ కు అధిష్టానం ఆహ్వానం వస్తుందని ఆయన వర్గీయులు బహిరంగంగానే చెబుతున్నారు. శుక్రవారం ఢిల్లీకి వెళ్లిన కెవిపి రామచందర్ రావు కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీతో మాట్లాడి అందుకు అవసరమైన రంగం తయారు చేసినట్లు కూడా చెబుతున్నారు. అయితే, జగన్ ను ఢిల్లీకి పిలిచే స్థితిలో పార్టీ అధ్యక్షురాలు సోనియా గాంధీ లేరని మరో వాదన వినిపిస్తోంది. ఇప్పటికి కూడా జగన్ కు కేంద్ర మంత్రి పదవి ఇచ్చేందుకు సోనియా సుముఖంగా ఉన్నట్లు ప్రచారం జరుగుతోంది.