అసీస్ లో మరో భారత విద్యార్థిపై దాడి

మెల్బోర్న్: ఆస్ట్రేలియాలో భారత విద్యార్థులపై దాడులు కొనసాగుతున్నాయి. తాజాగా మరో విద్యార్థిపై జరిగిన దాడి వెలుగులోకి వచ్చింది. ఆస్ట్రేలియాకు చెందిన కొంత మంది దుండగులు సిక్కు విద్యార్థి టర్బన్ ను తొలగించి, అతని తలపై కొట్టారు. బస్ స్టాప్ లో ఆ సిక్కు విద్యార్థి నిద్రిస్తుండగా ఈ సంఘటన చోటు చేసుకుంది. ఏ మాత్రం రెచ్చగొట్టకుండానే ఈ దాడి జరిగిందని, దీనిపై దర్యాప్తు చేస్తున్నామని పోలీసులు చెప్పారు. విద్యార్థి పేరు గానీ ఇతర వివరాలు గానీ తెలియడం లేదు.

కూపర్ స్ట్రీట్ లోని ఎప్పింగ్ రైల్వే స్టేషన్ లో సిక్కు విద్యార్థి నిద్రిస్తుండగా శనివారం అర్థరాత్రి దాటిన తర్వాత ఆదివారం ఉదయం 12.45 నిమిషాల ప్రాంతంలో 17 నుంచి 19 ఏళ్ల మధ్య వయస్సు గల ఐదుగురు యువకులు ఈ దాడికి పాల్పడినట్లు ది ఏజ్ పత్రిక రాసింది. ఐదుగురిలో ఇద్దరు యువకులు అతన్ని కొడుతుండగా మరో ముగ్గురు ఆపడానికి ప్రయత్నించినట్లు సమాచారం. 60 బస్సు డ్రైవర్, ఇతర ప్రయాణికులు కూడా యువకులను అపడానికి ప్రయత్నించారు. సిక్కు విద్యార్థిని కొట్టిన తర్వాత ఐదుగురు యువకులు కూడా అక్కడి నుంచి పారిపోయారు.సిక్కు విద్యార్థి నోటికి గాయమైందని, అయితే చికిత్స ఏమీ అవసరం లేదని ఆ పత్రిక తెలిపింది.