పిసిసి నుంచి నన్ను మార్చరు: డిఎస్

న్యూఢిల్లీ: తనను మార్చే ఉద్దేశం పార్టీ అధిష్టానానికి లేదని ప్రదేశ్ కాంగ్రెసు కమిటీ (పిసిసి) అధ్యక్షుడు డి.శ్రీనివాస్ చెప్పారు. తన పార్టీ పదవికి వచ్చిన ముప్పేమీ లేదని ఆయన మంగళవారం మీడియా ప్రతినిధులతో అన్నారు. పార్టీ పదవి మార్పుపై పార్టీ అధిష్టానం తనకేమీ చెప్పలేదని ఆయన అన్నారు.

ప్రదేశ్ కాంగ్రెసు కమిటీ (పిసిసి) అధ్యక్ష పదవిని కడప పార్లమెంటు సభ్యుడు వైయస్ జగన్ కు అప్పగించే అవకాశాలున్నట్లు వార్తలు వచ్చాయి. దీంతో డి. శ్రీనివాస్ ను అధ్యక్ష పదవిని కోల్పోతారనే ప్రచారం ముందుకు వచ్చింది. ఈ స్థితిలో డి. శ్రీనివాస్ మీడియా ప్రతినిధులు వేసిన ప్రశ్నలకు స్పందించారు. డి. శ్రీనివాస్ సోమవారం సాయంత్రం ఢిల్లీ వచ్చారు. సోమవారమంతా ఆయన ఎక్కడ ఉన్నారనే విషయం ఎవరికీ అంతు పట్టలేదు. ఢిల్లీలో ఆయన ఎవరికీ కనిపించలేదు.