తెరాస జైల్ భరో: కెసిఆర్ ఆరెస్టు

హైదరాబాద్: హైదరాబాద్ ఫ్రీజోన్ కు వ్యతిరేకంగా తెలంగాణ రాష్ట్ర సమితి (తెరాస) చేపట్టిన జైల్ భరో కార్యక్రమం బుధవారం హైదరాబాదులో ఉద్రిక్తంగా మారింది. ఇందిరా పార్కు నుంచి సచివాలయానికి ప్రదర్శన నిర్వహిస్తున్న తెరాస కార్యకర్తలను పోలీసులు అడ్డుకున్నారు. పోలీసులను తోసుకుని ముందుకు పోవడానికి తెరాస కార్యకర్తలు ప్రయత్నించారు. దీంతో పోలీసులు తెరాస కార్యకర్తలపై లాఠీచార్జీ చేశారు. తెరాస అధ్యక్షుడు కె. చంద్రశేఖర రావును పోలీసులు అరెస్టు చేశారు. పోలీసులు అడ్డుకోవడంతో గన్ పార్కు వద్ద కెసిఆర్ బైఠాయించారు. దీంతో ఆయనను అరెస్టు చేశారు. సచివాలయం వైపు తెరాస కార్యకర్తలు చెప్పులు విసిరారు.

తెరాస కార్యకర్తలకు,పోలీసులకు మధ్య ఘర్షణ చెలరేగింది. దీంతో పరిస్థితి ఉద్రిక్తంగా మారింది. కార్యకర్తలను కూడా పోలీసులు అరెస్టు చేశారు. అంతకు ముందు హైదరాబాదులోని ఇందిరాపార్కు వద్ద బహిరంగ సభ జరిగింది. ఈ బహిరంగ సభలో కెసిఆర్ ప్రసంగించారు. ఫ్రీజోన్ వ్యవహారంలో ప్రభుత్వం అనుసరిస్తున్న వైఖరిని ఆయన విమర్శించారు. కాకతీయ విశ్వవిద్యాలయం మాజీ వైస్ చాన్సలర్ జయశంకర్ కూడా ఈ సభలో మాట్లాడారు. తాము రాష్ట్రపతి ఉత్తర్వులకు, 610 జీవోకు అనుకూలమేనని అన్ని పార్టీలు చెబుతున్నప్పటికీ వాటి అమలుకు మాత్రం పని చేయడం లేదని జయశంకర్ విమర్శించారు.