తెరాస అంతు చూస్తా: మైనంపల్లి

హైదరాబాద్: తెలంగాణ రాష్ట్ర సమితి (తెరాస) శాసనసభ్యులంతా అవినీతిపరులేనని తెలుగుదేశం మెదక్ జిల్లా రామాయంపేట శాసనసభ్యుడు మైనంపల్లి హనుమంతరావు ఆరోపించారు. ఒక్కో తెరాస శాసనసభ్యుడి అవినీతిని ఒక్కో రోజు బయట పెడతానని ఆయన శుక్రవారం మీడియా ప్రతినిధుల సమావేశంలో చెప్పారు. తెరాస అవినీతిని బయటపెట్టలేకపోతే తాను రాజకీయాల నుంచి తప్పుకుంటానని ఆయన అన్నారు. మెదక్ జిల్లా రామాయంపేట నియోజకవర్గంలో ఇటీవల తెరాస భూపోరాటం చేపట్టినప్పటి నుంచి ఆయన మండిపడుతున్నారు.

తెరాస శాసనసభ్యుడు హరీష్ రావు బంధువులు 110 ఎకరాలను కబ్జా చేశారని ఆయన ఆరోపించారు. ఆ భూముల నుంచి దళితులను వెళ్లగొట్టారని ఆయన అన్నారు. తెరాస అంతు చూసే దాకా తాను నిద్రపోనని ఆయన సవాల్ చేశారు. తాను త్వరలోనే సమైక్యాంధ్ర ఉద్యమం చేపడతానని ఆయన చెప్పారు. రాఘవాపూర్ లో బినామీ పేర్ల మీద అసైన్డ్ భూములను కొని హరీష్ రావు అమ్ముకున్నారని ఆయన ఆరోపించారు.