వైయస్సార్ మృతికి పార్లమెంటు నివాళి

న్యూడిల్లీ: దివంగత ముఖ్యమంత్రి వైయస్ రాజశేఖర రెడ్డి, కేంద్ర మాజీ మంత్రి పి.ఉపేంద్ర మరణాలకు పార్లమెంటు ఉభయ సభలు గురువారం సంతాపం ప్రకటించాయి. మరో తొమ్మిది మంది దివంగత సభ్యులకు కూడా పార్లమెంటు నివాళులు అర్పించింది. వారి మృతికి సంతాపసూచకంగా ఉభయ సభలు రెండు నిమిషాలు మౌనం పాటించాయి. వైయస్సార్ దేశంలోని గొప్ప నాయకుడిగా సభలు అభివర్ణించాయి. పేద ప్రజల కోసం వైయస్సార్ జీవితాన్ని అంకితం చేశారని కొనియాడాయి.

పార్లమెంటు శీతాకాలం సమావేశాలు గురువారం ప్రారంభమయ్యాయి.సంతాప తీర్మానానికి ముందు రాజ బబ్బర్ తో పాటు కొత్త సభ్యులు లోకసభలో ప్రమాణం చేశారు. రాజ్యసభ శుక్రవారానికి వాయిదా పడింది. పార్లమెంటు శీతాకాలం సమావేశాలు వాడిగా వేడిగా జరుగుతాయని భావిస్తున్నారు. మధుకొడా మనీ లాండరింగ్ కేసు, గాలి జనార్దన్ రెడ్డి ఓబుళాపురం మైనింగ్ వ్యవహారం, అధిక ధరలు వంటి పలు అంశాలు పార్లమెంటులో చర్చకు వచ్చే అవకాశం ఉంది.