ముందుగానే అజ్ఞాతంలోకి కెసిఆర్

హైదరాబాద్: తెలంగాణ రాష్ట్ర సాధన కోసం ఈ నెల 20వ తేదీన ఆమరణ నిరాహార దీక్షను ప్రారంభించనున్న తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావు రెండు రోజుల ముందుగా అజ్ఞాతంలోకి వెళ్లే అవకాశం ఉంది. పోలసులు అరెస్టు చేసే అవకాశం ఉండడంతో అజ్ఞాతంలోకి వెళ్లే ఉద్దేశంతో ఆయన ఉన్నట్లు చెబుతున్నారు. ఆమరణ నిరాహార దీక్ష చేపట్టడానికి ముందు తాను రెండు రోజులు విశ్రాంతి తీసుకుంటానని కెసిఆర్ ఇది వరకే చెప్పారు. విశ్రాంతి పేరుతో రెండు రోజులు అజ్ఞాతంలోకి వెళ్లి 29వ తేదీన సిద్ధిపేట మండలం కొనాయపల్లి శ్రీవెంకటేశ్వర స్వామిని దర్శనం చేసుకుని దీక్షా శిబిరానికి చేరుకునే అవకాశం ఉంది.

కెసిఆర్ ఆమరణ నిరాహార దీక్ష చేపడితే శాంతిభద్రతల సమస్య తలెత్తే ప్రమాదం ఉందని రాష్ట్ర ప్రభుత్వం భావిస్తోంది. దీంతో పోలీసులను అప్రమత్తం చేసింది. పోలీసులు కెసిఆర్ దీక్షను భగ్నం చేయాలనే ఉద్దేశంతో ఉన్నట్లు తెలుస్తోంది. దాంతో కెసిఆర్ ను ముందుగానే అరెస్టు చేయడానికి పోలీసు యంత్రాంగం సమాయత్తమవుతున్నట్లు సమాచారం. దీంతో కెసిఆర్ ఈ నెల 27, 28 తేదీల్లో ఎవరికీ కనిపించకుండా రహస్య ప్రదేశానికి వెళ్లే అవకాశం ఉన్నట్లు చెబుతున్నారు.