వైయస్ జగన్ కు డబ్బు మదం: టిడిపి

హైదరాబాద్: కడప పార్లమెంటు సభ్యుడు వైయస్ జగన్ డబ్బు మదంతో మాట్లాడుతున్నారని తెలుగుదేశం పార్టీ నాయకుడు వర్ల రామయ్య వ్యాఖ్యానించారు. అవినీతితో సంపాదించిన డబ్బు అహంతో జగన్ తమ పార్టీ అధ్యక్షుడు నారా చంద్రబాబు నాయుడుపై వ్యాఖ్యలు చేస్తున్నారని ఆయన శనివారం మీడియా ప్రతినిధుల సమావేశంలో అన్నారు. తమ నాన్న వైయస్ రాజశేఖర రెడ్డి కాలి గోటికి కూడా చంద్రబాబు సరిపోరని జగన్ డబ్బు మదంతోనే వ్యాఖ్యానించారని ఆయన అన్నారు. చంద్రబాబుకు జగన్ క్షమాపణలు చెప్పాలని ఆయన డిమాండ్ చేశారు.

వైయస్ జగన్ కు వచ్చినవారంతా డబ్బులివ్వడం వల్లనే వచ్చారని తెలుగుదేశం నాయకుడు కంభంపాటి రామ్మోహన్ రావు అన్నారు. డబ్బులిస్తేనే జగన్ ప్రచారానికి ప్రజలు వచ్చారని తమ సర్వేలో వెల్లడైందని ఆయన మీడియా ప్రతినిధుల సమావేశంలో చెప్పారు. పిలవని పేరంటానికి వచ్చినట్లు జగన్ ఎన్నికల ప్రచారం చేయడానికి వచ్చారని ఆయన అన్నారు.