లారీని ఢీకొన్న పెళ్లి వ్యాన్: 8మంది మృతి

నెల్లూరు: నెల్లూరు సమీపంలో ఆదివారం అర్థరాత్రి దాటిన తర్వాత జరిగిన రోడ్డు ప్రమాదంలో 8 మంది దుర్మరణం పాలయ్యారు. మృతులు గుంటూరు జిల్లా వినుకొండవాసులు. రోడ్డు పక్కన నిలిచి ఉన్న లారీని నెల్లూరు సమీపంలోని చిల్డ్రన్స్ పార్కు వద్ద క్వాలిస్ వ్యాన్ వెనక నుంచి ఢీకొట్టింది. దీంతో ఆరుగురు అక్కడికక్కడే మరణించారు. మరో ఇద్దరు ఆస్పత్రిలో చికిత్స పొందుతూ మృత్యువాత పడ్డారు.

శనివారం రాత్రి తిరుమలలో వివాహం అయిన తర్వాత ఆదివారం పెళ్లి బృందం స్వగ్రామానికి టెంపో, క్వాలిస్ వాహనాల్లో బయలుదేరింది. వధూవరులు ప్రమాదం నుంచి బయటపడ్డారు. పెళ్లి కొడుకు తల్లిదండ్రులు, తమ్ముడు, బాబాయి, నాయనమ్మ, పిన్నమ్మ, డ్రైవర్, మరో వ్యక్తి కోటేశ్వరరావు ప్రమాదంలో మరణించారు.

పెళ్లి కొడుకు మామ వేణుగోపాల్ అమెరికాలో సాఫ్ట్ వేర్ ఇంజినీరుగా పనిచేస్తున్నారు. పెళ్లి కూతురు మధులత బెంగుళూర్ వాస్తవ్యురాలు. మృతులను ఆంజనేయులు, పుష్పవతి, శ్రీకాంత్, రమేష్, ఆదెమ్మ, ఆత్మకూరి సుబ్బరత్నం, కోటేశ్వరరావులుగా గుర్తించారు. డ్రైవర్ కూడా మరణించిన విషయం తెలిసిందే.