సత్యం కేసులో అనుబంధ చార్జిషీట్

హైదరాబాద్: సత్యం కంప్యూటర్స్ కుంభకోణంలో కేంద్ర దర్యాప్తు సంస్థ (సిబిఐ) మంగళవారం అనుబంధ చార్జిషీట్ ను దాఖలు చేసింది. నాంపల్లిలో ప్రత్యేక కోర్టులో ఈ అనుబంధ చార్జిషీట్ ను సిబిఐ దాఖలు చేసింది. ఫిబ్రవరి 20వ తేదీన సిబిఐ ఈ కుంభకోణం కేసును స్వీకరించింది. సత్యం కంప్యూటర్స్ మాజీ చైర్మన్ రామలింగరాజు సోదరులతో పాటు మాజీ సిఎఫ్ వో వడ్లమాని శ్రీనివాస్, మాజీ ఆడిటర్లు సుబ్రహ్మణ్య గోపాలకృష్ణన్, తాళ్లూరి శ్రీనివాస్, సూర్యనారాయణ రాజు, రామకృష్ణ, వెంకటపతిరాజు, శ్రీశైలంలను నిందితులుగా పేర్కొంటూ జూలై 7వ తేదీన సిబిఐ చార్జిషీట్ దాఖలు చేసింది.

63 వేల పేజీల చార్జిషీట్ ను దాఖలు చేసింది. ఈ కేసులో 432 మంది సాక్షులను చేర్చింది. సత్యం కంప్యూటర్స్ లో నిధుల మళ్లింపు, బ్యాలెన్స్ షీట్ లో అవకతవకలు, ఉద్యోగుల సంఖ్య, వేతనాల్లో అవకతవకలు జరిగినట్లు సిబిఐ దర్యాప్తులో తేలింది. చార్జిషీట్ దాఖలు చేసిన తర్వాత కూడా దర్యాప్తు సిబిఐ దర్యాప్తు కొనసాగించింది. ఇటీవలే మాజీ ఆడిటర్ ప్రభాకర్ గుప్తాను సిబిఐ అరెస్టు చేసింది. మలేషియాలో కూడా దర్యాప్తు చేసింది. దీంతో మరి కొంత మంది నిందితులతో మంగళవారం సిబిఐ అనుబంధ చార్జిషీట్ ను దాఖలు చేసింది.