రెచ్చగొట్టవద్దు: ప్రభుత్వానికి ఈటెల హెచ్చరిక

కరీంనగర్: తమ పార్టీ కార్యకర్తలను రెచ్చగొట్టవద్దని తెలంగాణ రాష్ట్ర సమితి (తెరాస) శాసనసభా పక్ష నేత ఈటేల రాజేందర్ రాష్ట్ర ప్రభుత్వాన్ని హెచ్చరించారు. ప్రభుత్వంతో చర్చలకు తాము సిద్ధమని ఆయన సోమవారం మీడియా ప్రతినిధులతో అన్నారు. రెచ్చగొట్టే చర్యలకు పాల్పడితే సంభవించే పరిణామాలకు ప్రభుత్వమే బాధ్య వహించాలని ఆయన హెచ్చరించారు. హింసకు తమ పార్టీ కార్యకర్తలు పాల్పడడం లేదని, హింసకు పాల్పడేవారెవరో గుర్తించాలని తాము పోలీసు అధికారులను కోరామని, అందుకు పోలీసు అధికారులు అంగీకరించారని ఆయన చెప్పారు.

సోమవారం బంద్ ముగిసిన తర్వాత తమ తదుపరి కార్యక్రమంపై చర్చలు జరిపి నిర్ణయం తీసుకుంటామని ఆయన చెప్పారు. తెలంగాణ అంశం పార్టీలకు, సిద్ధాంతాలకు, జెండాలకు సంబంధించింది కాదని, అందువల్ల అందరూ తెలంగాణ కోసం ముందుకు రావాలని ఆయన కోరారు. తమ పార్టీ నేత కె. చంద్రశేఖర రావుకు ఏం జరిగినా ప్రభుత్వమే బాధ్యత వహించాల్సి ఉంటుందని మాజీ శాసనసభ్యురాలు పద్మా దేవేందర్ రెడ్డి అన్నారు. తాము ప్రశాంతంగా బంద్ నిర్వహిస్తున్నట్లు ఆమె తెలిపారు. మెదక్ డిపో వద్ద ఆమె ప్రదర్శన నిర్వహిస్తున్నారు.