ఒయు దగ్గర తార్నాకాలో విధ్వంసం

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు అరెస్టుకు నిరసనగా చేస్తున్న బంద్ హైదరాబాదులోని ఉస్మానియా విశ్వవిద్యాలయం సమీపంలోని తార్నాకాలో విధ్వంసం చెలరేగింది. దుండగులు తార్నాకాలోని రెండు పెట్రోల్ బంకులపై దాడి చేసి విధ్వంసం సృష్టించారు. మరో పెట్రోల్ బంక్ పై దాడికి చేసిన ప్రయత్నాన్ని పోలీసులు తిప్పికొట్టారు. తార్నాకాలోని బిగ్ బజార్ పై కూడా దుండగులు దాడి చేశారు. ప్రైవేట్ వాహనాలపై దాడి చేసి వాటిని ధ్వంసం చేశారు. తార్నాకాలో తెరాస కార్యకర్తలు ముఖ్యమంత్రి కె. రోశయ్య శవయాత్ర నిర్వహించారు.

హైదరాబాదు శివారులోని రామచంద్రాపురంలో మూడు బస్సులను పెట్రోల్ పోసి దగ్ధం చేశారు. సోమవారం ఉదయం ఉస్మానియా విశ్వవిద్యాలయంలోని ఉన్నత విద్యా మండలి కార్యదర్శి క్రిస్టఫర్ ఇంటిపై విద్యార్థులు దాడి చేసిన విషయం తెలిసిందే. కారును, ఫర్నీచర్ ను విద్యార్థులు ధ్వంసం చేశారు. దుండగులు పోలీసు అవుట్ పోస్టు వద్ద వాహనాలను ధ్వంసం చేశారు. సికింద్రాబాదులోని రెజిమెంటల్ బజారులో ఒక ప్రైవేట్ విద్యాసంస్థ బస్సును దుండగులు దగ్ధం చేశారు.