తెలంగాణ ఏర్పాటుకు ఇదే సమయం: సుష్మా

న్యూఢిల్లీ: తెలంగాణ రాష్ట్ర ఏర్పాటుకు ఇదే సరైన సమయమని బిజెపి లోకసభ ఉప నేత సుష్మా స్వరాజ్ అన్నారు. ఆమె తెలంగాణ అంశాన్ని సోమవారం లోకసభలో ప్రస్తావించారు. తెలంగాణ రాష్ట్ర ఏర్పాటుకు వెంటనే పార్లమెంటులో బిల్లును ప్రతిపాదించాలని ఆమె కేంద్ర ప్రభుత్వాన్ని డిమాండ్ చేశారు. తెలంగాణపై యుపిఎ ప్రభుత్వ వైఖరిని స్పష్టం చేయాలని ఆమె కోరారు. కేంద్ర హోం మంత్రి ప్రకటన చేయాలని బిజెపి సభ్యులు పట్టుబట్టారు. తెలంగాణ రాష్ట్ర ఏర్పాటుకు తమ పార్టీ కట్టుబడి ఉందని సుష్మా స్వరాజ్ చెప్పారు.

తెలంగాణ రాష్ట్ర ఏర్పాటును డిమాండ్ చేస్తూ విద్యార్థులు జెఎసిగా ఏర్పడడాన్ని, తెలంగాణ రాష్ట్ర సమితి (తెరాస) అధ్యక్షుడు ఆమరణ నిరాహార దీక్ష చేస్తుండడాన్ని ఆమె ప్రస్తావించారు. రాజ్యసభలో ఈ అంశాన్ని ఎం. వెంకయ్యనాయుడు ప్రస్తావించారు. తెలంగాణ రాష్ట్ర ఏర్పాటుకు బిల్లును ప్రతిపాదిస్తే తాము బలపరుస్తామని ఆయన చెప్పారు. తెలంగాణ రాష్ట్ర ఏర్పాటుకు తమ పార్టీ కట్టుబడి ఉందని ఆయన అన్నారు. ఆయన సోమవారం కెసిఆర్ తనయుడు కెటి రామారావుకు ఫోన్ చేసి కెసిఆర్ ఆరోగ్య పరిస్థితిని అడిగి తెలుసుకున్నారు.