సోనియాకు కాంగ్రెసు ఎమ్మెల్సీల లేఖ

హైదరాబాద్: తెలంగాణ రాష్ట్రం ఏర్పాటుకు చర్యలు ప్రారంభించాలని కోరుతూ 14 మంది కాంగ్రెసు తెలంగాణ ఎమ్మెల్సీలు పార్టీ అధ్యక్షురాలు సోనియా గాంధీకి మంగళవారం లేఖ రాశారు. తెలంగాణ రాష్ట్ర ఏర్పాటుకు చర్యలు తీసుకోవడం తప్ప మార్గాంతరం లేదని సీనియర్ కాంగ్రెసు నాయకుడు, ఎమ్మెల్సీ అమోస్ అన్నారు. ఈ మేరకు తాము సోనియాకు లేఖ రాసినట్లు ఆయన తెలిపారు. మళ్లీ సాయంత్రం సమావేశం కావాలని ఎమ్మెల్సీలు అనుకున్నారు. ముఖ్యమంత్రి రోశయ్య సర్ది చెప్పడంతో సమావేశాన్ని వారు రద్దు చేసుకున్నారు.

కాగా, మాజీ మంత్రి ఆర్. దామోదర్ రెడ్డి నివాసంలో సమావేశమైన కాంగ్రెసు తెలంగాణ శాసనసభ్యులు రేపు సోనియా గాంధీకి లేఖ రాయనున్నారు. ఈ విషయాన్ని దామోదర్ రెడ్డి మీడియా ప్రతినిధులతో చెప్పారు. తెలంగాణ ఏర్పాటు కోసం మాజీ హోం మంత్రి కె. జానారెడ్డి, మాజీ మంత్రి ఆర్ దామోదర్ రెడ్డి గత రెండు రోజులుగా మంతనాలు జరుపుతున్నారు. కాగా, తెలంగాణ విషయంలో తాము తమ కాంగ్రెసు పార్టీ అధిష్టానం నిర్ణయానికి కట్టుబడి ఉంటామని రాయలసీమకు చెందిన సీనియర్ శాసనసభ్యుడు జెసి దివాకర్ రెడ్డి చెప్పారు. కెసిఆర్ సేవలు రాష్ట్రానికి ఎంతైనా అవసరసమని, దీన్ని దృష్టిలో పెట్టుకుని కెసిఆర్ దీక్ష విరమించాలని ఆయన అన్నారు.