తెలంగాణ ఇచ్చుడో, సచ్చుడో: కిషన్

హైదరాబాద్: తెలంగాణ ఇచ్చుడో సచ్చుడో ఈ శాసనసభా సమావేశాల్లోనే తేల్చుకుంటామని బిజెపి శాసనసభా పక్ష నేత జి. కిషన్ రెడ్డి అన్నారు. శాసనసభ ఆవరణలోని మీడియా పాయింట్ వద్ద ఆయన మంగళవారం మీడియా ప్రతినిధులతో మాట్లాడారు. తెలంగాణ ఉద్యమాన్ని కించపరిచే విధంగా రెవెన్యూ మంత్రి ధర్నాన ప్రసాద రావు తెలంగాణ ప్రజలకు క్షమాపణ చెప్పాలని ఆయన డిమాండ్ చేశారు. రాష్ట్ర ప్రభుత్వం సోమవారం అర్థరాత్రి అఖిల పక్ష సమావేశాన్ని ఎందుకు ఏర్పాటు చేసిందో చెప్పాలని ఆయన డిమాండ్ చేశారు.

ప్రాణాలకు, ఆస్తులకు సెటిలర్లు భయపడాల్సిన అవసరం లేదని, వారి ప్రాణాలకు, ఆస్తులకు రక్షణ కల్పిస్తామని ఆయన చెప్పారు. ప్రభుత్వం కొండను తవ్వి ఎలుకను కూడా పట్టలేదని ముఖ్యమంత్రి ఏర్పాటు చేసిన అఖిల పక్ష సమావేశంపై కిషన్ రెడ్డి వ్యాఖ్యానించారు. అనంతరం ఆయన ధర్నా చేశారు. దీంతో ఆయనను పోలీసులు అరెస్టు చేశారు.