కెసిఆర్ కు రామోజీ పరామర్శ, ఆరోగ్యంపై జాగ్రత్తలు

హైదరాబాద్: తెలంగాణ రాష్ట్ర సాధన కోసం ఆమరణ నిరాహార దీక్ష చేస్తున్న తెరాస అధ్యక్షుడు కె.చంద్రశేఖర్‌రావును రామోజీ గ్రూపు సంస్థల ఛైర్మన్‌ రామోజీరావు సోమవారం నిమ్స్‌కు వెళ్లి పరామర్శించారు. ఆరోగ్యం విషయంలో జాగ్రత్తగా ఉండాలని సూచించారు. కేసీఆర్‌ ఆరోగ్య పరిస్థితిపై ఆయన కుమారుడు తారక రామారావు, కూతురు కవితతో మాట్లాడారు. రామోజీరావుతో పాటు ఫిలిం సిటీ ఎండీ రామ్మోహన్‌రావు, 'ఈనాడు' మేనేజింగ్‌ డైరెక్టర్‌ సీహెచ్‌ కిరణ్‌ కూడా కేసీఆర్‌ను పరామర్శించారు.

తెలంగాణ రాష్ట్ర సాధన కోసం నిరాహార దీక్ష చేపట్టి, ప్రస్తుతం అనారోగ్యంతో హైదరాబాద్‌లోని నిమ్స్‌లో చికిత్స పొందుతున్న తెరాస అధినేత కె.చంద్రశేఖర్‌ రావును పలువురు నాయకులు పరామర్శించారు. వీరిలో తెలుగుదేశం అధ్యక్షుడు చంద్రబాబు నాయుడు, లోక్‌సత్తా అధ్యక్షుడు జయప్రకాశ్‌ నారాయణ్‌, కాంగ్రెస్‌ రాజ్యసభ సభ్యుడు వి.హనుమంతరావు, మాజీ ఎంపీ వినోద్‌, ఎంఆర్‌పీఎస్‌ అధ్యక్షుడు మంద కృష్ణ మాదిగ తదితరులు ఉన్నారు. ఈ సందర్భంగా వారు విలేఖరులతో మాట్లాడారు.