అసెంబ్లీని కుదిపేసిన తెలంగాణ లొల్లి

హైదరాబాద్: శాసనసభను బుధవారం కూడా తెలంగాణ అంశం కుదిపేసింది. సభ సమావేశం కాగానే తెరాస సభ్యులు తెలంగాణపై ఏక వాక్య నిర్మాణం చేయాలని తెలంగాణ రాష్ట్ర సమితి (తెరాస) శాసనసభ్యులు పట్టుబట్టారు. తొలుత రెండు సార్లు వాయిదా పడిన శాసనసభ ఎట్టకేలకు పరిస్థితి అదుపులోకి రాకపోవడంతో స్పీకర్ కిరణ్ కుమార్ రెడ్డి సభను రేపటికి వాయిదా వేశారు. సభ వాయిదా పడిన తర్వాత తెరాస, సిపిఐ, బిజెపి సభ్యుల సభ ఆవరణలోని గాంధీ విగ్రహం వద్ద బైఠాయింపు జరపడానికి సమాయత్తమయ్యారు. వారిని పోలీసులు అడ్డుకున్నారు. దీంతో ఉద్రిక్త పరిస్థితి నెలకొంది.

అంతకు ముందు ఒకసారి శాసనసభ 15 నిమిషాల పాటు, ఆ తర్వాత అర గంట పాటు వాయిదా పడింది. తిరిగి సమావేశమైన తర్వాత కూడా తెరాస సభ్యులు తమ పట్టు వీడలేదు. తెలంగాణపై కేంద్ర ప్రభుత్వం సరైన సమయంలో సరైన నిర్ణయం తీసుకుంటుందని ముఖ్యమంత్రి రోశయ్యతో పాటు జె గీతారెడ్డి తదితర మంత్రులు చెప్పారు. కెసిఆర్ చేత దీక్ష విరమింపజేయాలని వారు కోరారు. అయినా తెరాస సభ్యులు పట్టు వీడలేదు. దాంతో సభను స్పీకర్ రేపటికి వాయిదా వేశారు.