చేతులెత్తేసిన కాంగ్రెసు కోర్ కమిటీ

న్యూడిల్లీ: తెలంగాణపై ఏ నిర్ణయం తీసుకోకుండానే కాంగ్రెసు కోర్ కమిటీ సమావేశం ముగిసింది. సమావేశానంతరం మీడియాతో మాట్లాడడానికి కోర్ కమిటీ నాయకులు నిరాకరించారు. బుధవారం సాయంత్రం ఐదు గంటలకు పార్లమెంటులోని ప్రధాని మన్మోహన్ సింగ్ నాయకత్వంలో కాంగ్రెసు అధ్యక్షురాలు సోనియా గాంధీ నాయకత్వంలో కోర్ కమిటీ సమావేశం జరిగింది. దాదాపు గంట పాటు చర్చలు జరిగాయి. అయితే ఈ సమావేశంలో నిర్ణయమేదీ జరగలేదని కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ చెప్పారు.

తెలంగాణ రాష్ట్ర సమితి (తెరాస) అధ్యక్షుడు కె.చంద్రశేఖర రావు ఆరోగ్యంపై కోర్ కమిటీ ఆందోళన వ్యక్తం చేసింది. దీక్ష విరమించాలని కోర్ కమిటీ కెసిఆర్ కు విజ్ఞప్తి చేసింది. తెలంగాణపై ఇప్పటికిప్పుడు నిర్ణయం తీసుకోవడానికి వీలు కాదని, ఇది సున్నితమైన విషయమని మొయిలీ అన్నారు. పరిస్థితిని అర్థం చేసుకుని కెసిఆర్ దీక్ష విరమించాలని కోర్ కమిటీ కోరింది. కోర్ కమిటీ సమావేశంలో ప్రణబ్ ముఖర్జీ, ఆంటోనీ, అహ్మద్ పటేల్, వీరప్ప మొయిలీ తదితరులు పాల్గొన్నారు. దీక్ష విరమించాలని ప్రధాని మన్మోహన్ సింగ్ కెసిఆర్ కు ఫోన్ చేసే అవకాశం ఉంది.