విద్యా సంస్థల మూసివేతపై హైకోర్టు కొరడ

హైదరాబాద్: విద్యాసంస్థల మూసివేతపై ముఖ్యమంత్రి కె.రోశయ్య ప్రభుత్వానికి చుక్కెదురైంది. విద్యా సంస్థలను మూసివేస్తూ రాష్ట్ర ప్రభుత్వం జారీ చేసిన జోవోను హైకోర్టు బుధవారం కొట్టేసింది. హాస్టళ్లను కూడా తెరవాలని ఆదేశించింది. హాస్టళ్లలో మంచినీరు, కరెంట్ సరఫరాను పునరుద్ధరించాలని హైకోర్టు ఆదేశించింది. విద్యార్థులు తెలంగాణ ఉద్యమాన్ని ఉధృతం చేసిన నేపథ్యంలో తెలంగాణలోని విద్యాసంస్థలను 15 రోజుల పాటు మూసివేస్తూ రాష్ట్ర ప్రభుత్వం ఉత్తర్వులు జారీ చేశారు. విద్యార్థుల్లోకి సంఘ విద్రోహ శక్తులు ప్రవేశించాయనే ప్రభుత్వ వాదనతో హైకోర్టు ఏకీభవించలేదు. సంఘ విద్రోహ శక్తులు ఉంటే గుర్తించి చర్యలు తీసుకోవాలని సూచించింది.

హైకోర్టు ఆదేశాల నేపథ్యంలో విద్యార్థులు ఒక్కరొక్కరే ఉస్మానియా విశ్వవిద్యాలయానికి చేరుకుంటున్నారు. శాంతియుతంగా ప్రదర్శన చేస్తున్న 200మంది విద్యార్థులను పోలీసులు అరెస్టు చేశారని విశ్వవిద్యాలయ అధికారులు చెప్పారు. వెంటనే మంచినీటిని, కరెంటును పునరుద్ధరిస్తామని వారు చెప్పారు. పోలీసులను ఉపసంహరించాలని వారు కోరుతున్నారు. విద్యార్థులు శాంతియుతంగా ప్రదర్శనలు చేయాలని వారు కోరారు. విశ్వవిద్యాలయంలో శాంతియుతంగా నిరసన ప్రదర్సనలు చేస్తే తాము రక్షణ కల్పించగలమని వారు చెప్పారు.