చికిత్స, సెలైన్ లను నిరాకరిస్తున్న కెసిఆర్

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు బుధవారంనాడు సెలైన్ ఎక్కించుకోవడానికి కూడా నిరాకరిస్తున్నారు. ఆయన నిరాహార దీక్ష బుధవారంనాటికి 11వ రోజుకు చేరుకుంది. కెసిఆర్ ఆరోగ్యంపై నిజాం వైద్య విజ్ఞాన సంస్థ (నిమ్స్) వైద్యులు ఇప్పటికే చేతులెత్తేశారు. ఎన్నో రోజులు ఇలా మందులిస్తూ కెసిఆర్ ను నిలబెట్టడం కష్టమని వారన్నారు. వైద్య పరీక్షలను, చికిత్సను కూడా ఆయన నిరాకరిస్తున్నారు.

ప్రభుత్వం కదిలి రాకపోవడంతో ఆయన తీవ్ర నిరనన వ్యక్తం చేస్తున్నట్లు సమాచారం. కాగా, కెసిఆర్ దీక్ష విరమించడానికి వీలైన ప్రతిపాదనలతో ప్రభుత్వం ముందుకు వచ్చే పరిస్థితి లేకపోవడంతో తెలంగాణ మేధావులు రంగంలోకి దిగుతున్నారు. కెసిఆర్ చేత దీక్ష విరమింపజేసేందుకు పూనుకుంటున్నారు. తెలంగాణ సంఘాల ఐక్య కార్యాచరణ కమిటీ నాయకులు, మేధావులు నిమ్స్ కు వెళ్లి దీక్ష విరమించాలని కోరే అవకాశం ఉంది. కెసిఆర్ మరణించాలనే కేంద్ర, రాష్ట్ర ప్రభుత్వాలు కోరుకుంటున్నాయనే ఆందోళన తెలంగాణలో నెలకొంది.