ఇక్కడో డ్రామా, ఢిల్లీలో మరోటి: జూలకంటి

హైదరాబాద్: కాంగ్రెసు ఇక్కడో నాటకం, ఢిల్లీలో మరో నాటకం ఆడుతోందని సిపిఎం శాసనసభ్యుడు జూలకంటి రంగారెడ్డి విమర్శించారు. రాజకీయ పార్టీలకు అతీతంగా శాసనసభ్యులు ప్రాంతాల వారీగా విడిపోవడాన్ని ఆయన తప్పు పట్టారు. శాసనసభ సోమవారానికి వాయిదా పడిన తర్వాత ఆయన మీడియా ప్రతినిధులతో మాట్లాడారు. తెలంగాణ తీర్మానం శాసనభలో ప్రవేశపెడుతామని చెప్పి ఇప్పుడు ముఖ్యమంత్రి రోశయ్య బుకాయిస్తున్నారని ఆయన అన్నారు. కాంగ్రెసు పార్టీ ఆడుతున్న నాటకం ప్రజలకు అర్థం కావడం లేదని ఆయన అన్నారు. అన్ని పార్టీలు ప్రజలను గందరగోళ పరుస్తున్నాయని ఆయన విమర్శించారు.

ప్రాంతీయ తత్వాలను మరింత పెంచే విధంగా రాజకీయ పార్టీలు వ్యవహరిస్తున్నాయని ఆయన విమర్శించారు. నిర్దిష్టమైన ఆలోచనతో ఒక పద్ధతి ప్రకారం కాంగ్రెసు ముందుకు రాకపోవడాన్ని ఆయన తప్పు పట్టారు. తెలంగాణ అంశం ఢిల్లీ కోర్టులో ఉందని రోశయ్య, అసెంబ్లీకి అప్పగించామని కేంద్రం చెప్పాయని, ఇది కాంగ్రెసు నాటకమని ఆయన అన్నారు. తెలంగాణ ప్రజలకోసం పెద్ద మనుషుల ఒప్పందాన్ని, ఆరు సూత్రాల పథకాన్ని, 610 జీవోను అమలు చేయకపోవడం వల్ల ప్రాంతీయ అసమానతలు పెంచి పోషించే విధంగా ప్రభుత్వాలు వ్యవహరించాయని ఆయన అన్నారు.