రద్దీ కారణంగా తిరుమలలో లడ్డూల కొరత

తిరుపతి: వైకుంఠ ఏకాదశి సందర్భంగా భక్తుల రద్దీ ఎక్కువవడంతో తిరుమలలో లడ్డుల కొరత ఏర్పడింది. ఎంతో ప్రాముఖ్యత గలిగిన స్వామివారి ప్రసాదం లడ్డులు లభించక భక్తులు తీవ్ర అసంతృప్తికి లోనయ్యారు. నిన్న ఒక్క రోజే లక్షా 50వేల మంది భక్తులు రావడంతో ఈ పరిస్థితి ఏర్పడింది.

తిరుమలలో రోజుకి లక్షా 25 వేల లడ్డులను మాత్రమే తయారు చేస్తారు. భక్తుల రద్దీ ఎక్కువవడం, లడ్డుల కొరత ఏర్పడడంతో విచక్షణ కోటా అంటే సిఫారసు లేఖలపై ఇచ్చే లడ్డులను టిటిడి రద్దు చేసింది. జనవరి ఒకటో తేదీన కొత్త సంవత్సరం కారణంగా భక్తుల రద్దీ తీవ్రంగా ఉండి మళ్ళీ లడ్డూల కొరత ఏర్పడే అవకాశముందని అధికారులు అంచనా వేసుకున్నారు.

వైకుంఠ ఏకాదశి సందర్భంగా తిరుమలలో విపరీతమైన రద్దీ నెలకొనడంతో మంగళవారం మహ ద్వార ప్రవేశం రద్దు చేస్తున్నట్లు టీటీడీ అధికారులు ప్రకటించారు. ఏకాదశి సందర్భంగా సోమవారం లక్షలాది మంది తరలిరావడంతో యంత్రాంగం విస్తృత సేవలు అందించిందని టీటీడీ పీఆర్వో రవి ఒక ప్రకటనలో తెలిపారు.