తెలంగాణపై ఒక్క మాటలో చెప్పు: జయప్రకాష్ నారాయణ

హైదరాబాద్: ప్రత్యేకతెలంగాణ విషయంలో స్పష్టమైన వైఖరి తెలియజేయాలంటూ లోక్‌సత్తా పార్టీ అధినేత, కూకట్‌పల్లి ఎమ్మె ల్యే డాక్టర్‌ జయప్రకాష్‌ నారాయణను మంగళవారం తెలంగాణవాదులు ఘోరావ్‌ చేశారు. కూకట్‌పల్లి సర్కిల్‌ కార్యాలయంలో నిర్వహించిన సమీక్షా సమావేశానికి ఆయన హాజరయ్యారు. ఈ సందర్భంగా మూసాపేటకు జేఏసీ నాయకులు సమావేశం హాల్‌లోకి దూసుకెళ్లి ప్రత్యేక తెలంగాణ ఏర్పాటు విషయంలో నిర్ణయాన్ని వెల్లడించాలని జేపీని డిమాండ్‌ చేశారు. తెలంగాణకు అనుకూలంగా నినాదాలు చేయడంతోపాటు ఆయన్ను నిలదీశారు.

దీంతో స్పందించిన జేపీ తన వైఖరేంటో ఇప్పటికే ప్రకటించానని, కేంద్రం చేసిన ప్రకటనకు కట్టుబడి ఉండాలని ఆయన జేఏసీ నాయకులకు సూచించారు. అయినా వారు పట్టువీడకుండా అవును, కాదు రెండు మాటల్లో తేల్చాలని భీష్మీంచారు. సమావేశానంతరం బయటకొచ్చిన జేపీ కారును అడ్డుకొని ఎమ్మెల్యే పదవికి రాజీనామా చేయాలని, నిరసన దీక్షా శిబిరాన్ని సందర్శించి, సంఘీభావం తెలపాలని డిమాండ్‌ చేశారు. అయితే జేపీ ఎలాంటి సమాధానం చెప్పకుండా వెళ్లిపోయే ప్రయత్నం చేయగా జేఏసీ నాయకులు కారు ముందు బైఠాయించారు. దీంతో పోలీసులు రంగ ప్రవేశం చేసి వారిని అదుపులోకి తీసుకుని కారును ముందుకుపోనిచ్చారు. దీంతో కొద్దిసేపు ఉద్రిక్త పరిస్థితులు ఏర్పడ్డాయి.