ఉస్మానియాలో ఉత్తమ్ విస్తృత చర్చలు

హైదరాబాద్: రాష్ట్ర విభజనపై ఈ నెల 5వ తేదీన కేంద్ర హోం మంత్రిత్వ శాఖ ఏర్పాటు చేసిన సమావేశంలో వినిపించాల్సిన వాదనపై కాంగ్రెసు శాసనసభ్యుడు ఉత్తమకుమార్ రెడ్డి తీవ్ర కసరత్తు చేస్తున్నారు. కాంగ్రెసు ప్రతినిధులుగా కోస్తాంధ్ర నుంచి కావూరి సాంబశివరావు, తెలంగాణ నుంచి ఉత్తమ కుమార్ రెడ్డి రేపటి సమావేశంలో పాల్గొంటున్నారు. దీంతో తాను వినిపించాల్సిన వాదనపై ఉత్తమ కుమార్ రెడ్డి వివిధ వర్గాలతో ఆదివారం సాయంత్రం నుంచి భేటీ అవుతున్నారు.

ఉత్తమకుమార్ రెడ్డి సోమవారం ఉదయం ఉస్మానియా విశ్వవిద్యాలయం అధ్యాపకులతో సమావేశమయ్యారు. రాజకీయ పార్టీలు, ప్రజా సంఘాల జెఎసి కన్వీనర్ కోదండరామ్ తో పాటు ఆయన ఉస్మానియా ఫ్యాకల్టీ క్లబ్ లో అధ్యాపకులతో సమావేశమయ్యారు. ఆ తర్వాత ఆయన ఉస్మానియా విద్యార్థుల జెఎసి నాయకులతో భేటీ అయ్యారు. వారి వాదనలు విన్నారు. మహా గర్జనలో విద్యార్థులు చేసిన తీర్మానాల ప్రతిని తీసుకున్నారు. ఉత్తమకుమార్ రెడ్డి ఆదివారంనాడు కాంగ్రెసు తెలంగాణ ప్రజాప్రతినిధులతో ఆర్ దామోదర్ రెడ్డి నివాసంలో సమావేశమయ్యారు.