తెలంగాణకు కేంద్రం అనుకూలం: సిపిఐ

న్యూఢిల్లీ: కేంద్ర ప్రభుత్వం తెలంగాణ రాష్ట్ర ఏర్పాటుకు అనుకూలంగా ఉన్నట్లు నేటి సమావేశం ద్వారా అర్థమైందని సిపిఐ రాష్ట్ర కార్యదర్శి కె. నారాయణ అన్నారు. కేంద్ర హోం మంత్రి చిదంబరంతో మంగళవారం జరిగిన అఖిల పక్ష సమావేశానంతరం ఆయన మీడియా ప్రతినిధులతో మాట్లాడారు. తెలంగాణ రాష్ట్ర ఏర్పాటుకు యుపిఎ ఉమ్మడి కార్యాచరణ ప్రణాళినకలో హామీ ఇచ్చారని, ఎన్నికల ప్రణాళికలో చేర్చారని ఆయన అన్నారు. తాము భాషా ప్రయుక్త రాష్ట్రాలకే కట్టుబడి ఉన్నట్లు సిపిఎం ప్రతినిధులు చెప్పారు. రాష్ట్రంలో పరిస్థితికి కేంద్ర ప్రభుత్వమే కారణమని వారు విమర్శించినట్లు సమాచారం.

తెలంగాణ రాష్ట్ర ఏర్పాటుపై కేంద్ర ప్రభుత్వ చిత్తశుద్ధిని బిజెపి రాష్ట్ర అధ్యక్షుడు బండారు దత్తాత్రేయ శంకించారు. తెలంగాణ రాష్ట్ర ఏర్పాటుకు బడ్జెట్ సమావేశాల్లో బిల్లు ప్రతిపాదించాలని ఆయన డిమాండ్ చేశారు. తెలంగాణపై కేంద్రం గానీ, కాంగ్రెసు పార్టీ గానీ స్పష్టమైన ప్రకటన చేయకపోవడాన్ని ఆయన తప్పు పట్టారు. రాష్ట్రంలో పరిస్థితి కేంద్ర ప్రభుత్వ నిర్ణయం మీదనే ఆధారపడి ఉంటుందని తాము చెప్పినట్లు ఆయన తెలిపారు. తెలంగాణలోని ఇతర ప్రాంతాల ప్రజల ప్రాణాలకు, ఆస్తులకు రక్షణ కల్పించాల్సి ఉందని ఆయన చెప్పారు. తెలంగాణ రాష్ట్ర ఏర్పాటుకు కాలయాపన మంత్రాన్నే కేంద్రం ఆచరిస్తోందని ఆయన విమర్శించారు.