వైయస్ మృతిపై సిబిఐ విచారణకు ద్రోణంరాజు డిమాండ్

విశాఖపట్నం: దివంగత ముఖ్యమంత్రి వైయస్ రాజశేఖరరెడ్డి మృతికి సంబంధించి మరోసారి సీబీఐ విచారణ జరిపించాలని ఎమ్మెల్యే ద్రోణంరాజు శ్రీనివాస్‌ కోరారు. రిలయన్స్‌పై వస్తున్న ఆరోపణలను దృష్టిలో ఉంచుకుని ఆ కోణంలో సీబీఐ దర్యాప్తును పూర్తిస్థాయిలోచేపట్టాలన్నారు. ఈ విషయమై నిజానిజాలు ప్రజలకు తెలియజేయాల్సిన అవసరం ఉందన్నారు. ప్రస్తుతం కాంగ్రెస్‌ నాయకులు, కార్యకర్తలు , ప్రజలు కూడా ఆందోళనలకు గురవుతున్నారన్నారు.

వైయస్ మృతికి సంబంధించి రిలయన్స్‌పై వెల్లువెత్తిన ఆరోపణలపై దర్యాప్తుజరపాలని పీసీసీ కార్యదర్శి కొయ్య ప్రసాదరెడ్డి డిమాండ్‌ చేశారు. ఈ విధమైన చర్యలకు రిలయన్స్‌ పాల్పడి ఉంటే ఏ ఒక్కరూ క్షమించరని ఇది దుర్మార్గమైన చర్య అని ఆయన అభివర్ణించారు. అందుకే తక్షణం ప్రభుత్వం సీబీఐ దర్యాప్తునకు ఆదేశాలు ఇవ్వాలని ఆయన డిమాండ్‌ చేశారు. ప్రజలు కార్యకర్తలు నాయకుల్లో వున్న అపోహలను కూడా నివృత్తి చేయాలని కోరారు.