బోర్ వెల్ లో పడిన మహేష్ మృతి

వరంగల్: వరంగల్ జిల్లా చంద్రూ తండాలో బోరుబావిలో పడిన రెండేళ్ల బాలుడు మహేష్ మరణించాడు. సరిగ్గా 24 గంటలకు మహేష్ మృతదేహాన్ని సహాయక బృందాలు వెలికి తీశాయి. మహేష్ ను కాపాడడానికి చేసిన ప్రయత్నాలేవీ ఫలించలేదు. బోర్ బావికి సమాంతరంగా మరో బావిని తీసి మహేష్ ను రక్షించడానికి ప్రయత్నాలు చేశారు. పైపుల ద్వారా మహేష్ కు ఆక్సిజన్ పంపుతున్నారు. దాదాపు 30 అడుగుల మేరకు సమాంతరంగా బావి తవ్వి మహేష్ మృదేహాన్ని వెలికి తీశారు. మరో ఆరడుగులు తవ్వితే మహేష్ ను రక్షించడానికి వీలవుతుందని భావించారు. అయితే శ్రమ అంతా వృధానే అయింది.

నాలుగు ప్రొక్లెయిన్లతో బోరు బావిని తవ్వారు. సింగరేణి రెస్క్యూ టీమ్స్ సహాయక చర్యల్లో పాల్గొన్నాయి. జిల్లా కలెక్టర్, ఎస్పీ సహాయక చర్యలను పర్యవేక్షించారు. తెలుగుదేశం శాసనసభ్యుడు ఎర్రబెల్లి దయాకర రావు కూడా అక్కడే ఉన్నారు. మహేష్ మరణించాడని తెలిసి తాండాలో విషాద వాతావరణం నెలకొంది.